بلوچستان اٹی شکست آتا دمدستی رسپانس کن ایمرجنسی ایمبولینس سروس بنا کننگک،صوبائی وزیر بخت محمد کاکڑ

کوئٹہ، صوبائی وزیر جانجوڑی بخت محمد کاکڑ پارینے کہ بلوچستان اٹی شکست آتا دمدستی رسپانس و نہادی انسانی جان تا رکھ اکن ایمرجنسی ایمبولینس سروسز آتے پوسکنوڑ کننگ انگ ءِ۔ ہائی وے تتون اوار جتا جتا ہند آتیا شکست آتا وخت آ حکومت بلوچستان نا اڈ تروک مرک 1122 بنجائی ہند آتے ٹی زہمی تے دمدستی طبی کمک فراوان کننگ آن پد گرج انا رِد اٹ ٹراما سینٹر و ایلو جانجوڑی ہند آتیا گدریفنگک۔ دا خیال آتا درشانی ءِ او ایم ای آر سی 1122 ہیڈ آفس اٹی 9 پوسکن ایمبولینس فراوان کننگ نا دود و ایمرجنسی رسپانس سافٹ ویئر نا بنا نا وخت آ کرے۔ دود آن تران کرسا ڈی جی ایم ای آر سی 1122 ذوالفقار جتوئی پارے کہ پوسکنوڑ ایمبولینس و ڈیجیٹل رسپانس سافٹ ویئر نا کمک اٹ ہلہلہ ئی حالیت آتیٹی رسپانس نا وخت پین گچین مریک و ٹھپی تے وخت آ طبی کمک نا فراوانی پک کننگ مننگ کیک۔ دا وخت آ ڈی جی ہیلتھ سروسز بلوچستان ڈاکٹر محمد امین مندوخیل پارے کہ محکمہ جانجوڑی ایمرجنسی سروسز آتے پین بھرمی جوڑ کننگ و صوبہ نا مُر انگا علاقہ غاتسکان وخت آ طبی آسراتی تا فراوانی کن کل دوئی وسیلہ غاتے کاریم اٹ اتنگ اٹی ءِ۔ او پارے کہ ایمرجنسی ایمبولینس سروس نا بیڑہ ٹی 9 پوسکن ایمبولینس اوار کننگانو ہرافک ایڈوانس لائف سپورٹ نا آسراتی آن شُپ ءُ۔ دا ایمبولینس آتا ودکی آن سروس نا کاریمی دنگ پین گچین مریک و شکست آتیٹی ٹھپی مروک بندغ آتے وخت آ طبی کمک و رکھوک وڑ اٹ گدریفنگ نا آسراتی دوئی مریک، ہراڑے مرک 1122 نا کل ریسکیور آک 24 گھنٹہ، سنبرینگوک و کسبی وڑ اٹ تینا خذمت آتے سر تننگ اٹی ءُ۔ شکست آتا وخت آ دمدستی رسپانس نا سوب آن کیہی نہادی انسانی جان تے بچفنگانے۔ صوبائی وزیر جانجوڑی بخت محمد کاکڑ پارے کہ نن بھاز زوت بلوچستان نا کل ایمبولینس آتے 1122 نا کنٹرول اینڈ کمانڈ اٹی اتنگ اٹی اُن تاکہ ایلو صوبہ غاتا وڑ اٹ بلوچستان نا لس الس ایمبولینس سروس آن فائدہ ہرفنگ کے او پارے کہ نن وزیراعلیٰ بلوچستان نا وژن نا رِد اٹ جانجوڑی بشخ اٹ انقلابی اصلاحات کننگ اٹی اُن تاکہ اوفتا فائدہ غاک الس اسکان سر مریر۔ مرک 1122 نا ایمرجنسی رسپانس سافٹ ویئر نا کمک اٹ مچ آ بلوچستان اٹی ساڑی ایمبولینس تا بھرمی ٹریکنگ مننگ کیک‘ دا نظام نا رِد اٹ ہر ضلع ٹی ساڑی ایمبولینس نا ساڑی پوزیشن، دوئی مننگ و ہن وبر نا بابت وخت آ معلومداری دوئی کننگ مریک۔ وخت اس کہ ہر وڑ انا ہلہلہ ئی ہنگامی حالیت اسے ٹی خڑک انگا ایمبولینس ءِ شکست نا ہند آ راہی کننگ مریک۔ او پارے کہ بلوچستان نا بھلا و تالان جغرافیائی دنگ اٹی الس ءِ وخت آ جانجوڑی نا آسراتی تا فراوانی کن ڈیجیٹلائزیشن وژن اسٹ انگا بھرمی کسر ءِ‘ پوسکنوڑ سافٹ ویئر نا کمک اٹ نئے بیرہ شفافیت اٹی ودکی مریک بلکہ ایمبولینس آتا بھرمی مانیٹرنگ، گچین بست و بند و ہلہلہ حالیت آتیٹی دمدستی رسپانس ءِ ہم پک کننگ مریک۔ صوبائی وزیر جانجوڑی ریسکیو ٹیم، ڈائریکٹر جنرل ہیلتھ، تعلقدار افسر و فیلڈ اٹی نن وے کاریم کروک کل مرک 1122 کارندہ غاتا کارکڑد نا ستاءِ کرسا پارے کہ دا بلوچستان اٹی اسہ ماڈل ایمرجنسی سروس اس جوڑ مسنے۔ حکومت بلوچستان نا کمک اٹ دا سروسز آتے پین تالان کننگک تاکہ صوبہ نا اسہ علاقہ اسے ٹی شکست نا وخت آ طبی کمک، بنائی طبی آسراتی و جانجوڑی نا ہند آتسکان سر کننگ نا آسراتی دوئی مرے و نہادی انسانی جان تے بچفنگ مرے۔