وڈی خوری نا چٹفنگ اٹ طالب علم آک اہم ءُ کڑد اس ادا کننگ کیرہ،ڈی جی نیب بلوچستان

کوئٹہ، چیئرمین نیب انا وژن و وڈی خوری نا چٹفنگ نا حکمت عملی کمپین نا رِد اٹ، قومی احتساب بیورو (نیب بلوچستان) انا آفس نا 10 ستمبر 2026ء آ بیوٹمز یونیورسٹی کوئٹہ نا طالب علم و استاد آتا اسہ ڈل اس دورہ ءِ کرے۔ ڈل انا کماشی ءِ اسسٹنٹ ڈائریکٹر ظہور احمد کرے۔ ڈائریکٹر جنرل نیب بلوچستان نیاز حسن ڈل ءِ بخیر کرے و طالب علم آتے وڈی خوری نا برخلاف معلومات تا فراوانی ٹی دا وڑ انا دورہ غاتا اہمیت آ زور شاغا۔ ڈل نیب بلوچستان نا جتا جتا دفتر تا دورہ ءِ کرے، ہراڑے اوفک نیب انا کاریم نا وڑ و ڈول‘ غاو تا خف توننگ‘ انکوائری و پراسیکیوشن نا عمل نا بابت معلومداری دوئی کریر۔ ڈپٹی ڈائریکٹر نیب بلوچستان فرحان یوسف خان شریدار آتے تینا معلومداری لیکچر نا وخت آ نیب انا وڑ و ڈول‘ وژن، مشن و کارکڑد نا بابت جم تران کرے۔ ڈائریکٹر نیب محمد سلیم احمد طالب علم آتیان تران کرسا وڈی خوری نا چٹفنگ اٹی اوفتا اہم کڑد ءِ پیدوار کرے۔ او اسلامی تعلیمات نا رد اٹ خود احتسابی آ زور شاغا و پارے کہ اسلام اٹی وڈی خوری و بددیانتی نا ہچ ءُ گنجائشت اس اف۔ او تینائی گری‘ رشوت، سفارش، زور زوراکی و کنڈ ہلنگ ءِ وڈی خوری نا وڑ گوندا و دا ہیت آ ارمان نا درشانی ءِ کرے کہ دا رویہ غاک ننا راج اٹی ہڑدے نا گڑا جوڑ مسنو۔ ڈائریکٹر جنرل نیب بلوچستان نیاز حسن طالب علم آتیان تران کرے و طالب علم و فیکلٹی باسک آتا کنڈ آن کروک سوج آتا ورندی تے تس۔ او تینا تران اٹی چیئرمین نیب انا عزم انا دوارگی ءِ کرے کہ نیب تینا کل لائخی تے وڈی خوری نا توننگ و ہمو حکمت عملی آ کاریم اٹ اتنگ اٹی ءِ ہرافتیان محکمہ غاتیٹی وڈی خوری ءِ توننگ مرے۔ او نیب انا مسہ حکمت عملی Awareness، Prevention و Enforcement نا بابت ہیت کرے و نیب انا کانود و اونا ترمیم تا اہم بشخ آتیا ہیت کرے۔ او دا ہیت آ زور شاغا کہ طالب علم آک تینا اخلاق و کسبی چاہنداری ٹی گچینی اتسا وڈی خوری ءِ گچین وڑ اٹ توننگ کیرہ۔ د صفت اوفتا آخبت اٹی کماشی نا زمواری تے سر تننگ اٹ اہم ءُ مزل اس پک مننگ کیک۔ دورہ نا اخیر اٹ نیب بلوچستان نا کنڈ آن اسسٹنٹ ڈائریکٹر ظہور احمد ءِ یاتگیری شیلڈ تننگا و ہڑتوم آ کنڈآن اسٹ ایلو نا منتواری ءِ ہرفیر۔ دورہ کروک آ ڈل نیب انا گام گیج آتے وڈی خوری آن پاک راج اسے نا جوڑ کننگ نا کنڈآ مسختی و اہم مزل نا نشان گوندا۔