دہشت گردی نا برخلاف پوسکن، جامع و مُر ہروک جہانی ردِ عمل نا گرج ءِ، عاصم افتخار

نیویارک، پاکستان دہشت گردی نا برخلاف پوسکن، جامع و مُر ہروک جہانی ردِ عمل نا خواست کرسا اقوامِ متحدہ نا سلامتی کونسل آ زور شاغانے کہ او دہشت گردی نا مونی بروک گڑتی تتون مون تننگ کن تینا دہشت گردی تور انا پنجر ءِ سوگو کے و پابندی تا ساڑی نظام اٹی بروک آ خورکی تے مر کے۔ اقوامِ متحدہ ٹی پاکستان نا آخبتی مندوب سفیر عاصم افتخار احمد ‘دہشت گردی نا کارروائی تیان جہانی امن و سیکورٹی ءِ مون تروک خطرہ غاک، نائن الیون آن 25 سال پد، دہشت گردی نا برخلاف سلامتی کونسل نا جنگ انا پوسکنوڑ’ نا سرحال آ سلامتی کونسل آن تران کرسا ہفت پاکستانی تون اوار نائن الیون نا دہشت گرد جلہو تا گواچی مروک آتے خراجِ تحسین پیش کرے و امریکی حکومت و الس تون یکجہتی نا درشانی ءِ کرے۔ نائن الیون آ جہانی ردِ عمل نا ذکر ءِ کرسا سفیر عاصم افتخار احمد پارے کہ دا جلہو تا سوب آن سلامتی کونسل دمدستی کارروائی کرے، ہراٹی قرارداد 1373 نا منظوری ہم اوار ءِ، ہرا داسکان اقوامِ متحدہ نا دہشت گردی تور فریم ورک نا اسہ اہم ءُ بشخ اسے۔ او دہشت گردی نا برخلاف جہانی جنگ اٹی پاکستان نا فرنٹ لائن کڑد انا بابت ہیت کرسا پارے کہ پاکستان نا دہشت گردی تور انا کوشست، انٹیلی جنس کمکاری و جہانی شریدار آتتون اوار سیکورٹی ہمگرنچی القاعدہ نا واکداری ءِ نمان حد اسکان کم کرینے ہراڑان القاعدہ نا برخلاف جہانی مہم اٹی کل آن نمان سرسہبیک پاکستان نا دہشت گردی تورکوشست و فعال کمکاری نا کمک اٹ دوئی مسنو۔ پاکستان نا آخبتی مندوب عاصم افتخار احمد زور شاغا کہ پاکستان دا جنگ اٹی بھاز کبین ءُ نہاد اس تسنے‘ دا کرن نا بنا غان دا وخت اسکان سیکورٹی و کانود نافذ کروک کارندہ و لس شاری تتون اوار 90 ہزار آن زیات پاکستانی دہشت گردی نا گواچی مرسا تینا جان تے ندر کرینو،خت اس کہ داڑان بیدس پدریسہ زرگزرانی نسخان آک ہم ہرفوئی تمانو۔ اوپارے کہ سلامتی کونسل 25 سال مست ہلہلہ ئی بنداو‘ سیوت و عزم اتون ورندی تسوسس، ولے اوکان پد دہشت گردی نا خطرہ نا دروشم بدل مسنے، دہشت گردی نا منظرنامہ داسہ بدل مرسا پوسکن ءُ دروشم اس تینائی کرینے و پوسکن آ گڑتیک مونی بسنو۔ او پارے کہ جہانی دہشت گردی تور فریم ورک اٹی خورکی تے مر کننگ کن پابندی تا ساڑی نظام ءِ سوگو کننگ نا گرج ءِ۔ او انتہا پسندی نا ترندی‘ افریقہ، نیامی دے ٹک و اوغانستان اٹی دہشت گردی نا پدریسہ خطرہ غاتتون اوار دہشت گرد آتا غوغا‘ ذہن سازی، بھرتی، رابطہ و مالی کمک کن پوسکنوڑ ٹیکنالوجی نا کاریم اٹ اتنگ آ ہم ہیت کرے۔