جماعت اسلامی و حکومتی کمیٹی نا مذاکرات چار و پنچ شنبے آ مریک

لاہور، نائب امیر جماعت اسلامی پاکستان لیاقت بلوچ تون بنجائی وزیر ڈٹ بندی احسن اقبال ٹیلفون آ حوال کرسا حکومت و جماعت اسلامی نا نیام اٹی پٹرولیم لیوی آ (مذاکرات نا مسٹمیکو ریسہ کن ودیک اسہ دے اسے نا وارخواہی خواہس۔ جماعت اسلامی نا شعبہ حوالکاری نا رِد اٹ حکومت و جماعت اسلامی نا نیام اٹی پٹرولیم لیوی نا باندات آ مذاکرات نا مسٹمیکو دور ءِ دوشنبے آ مروئی ئس، ولے حکومت داسہ دا مذاکرات آتے سے شنبے آ کننگ نا خواست کرینے۔ نائب امیر جماعت اسلامی پاکستان لیاقت بلوچ پارے کہ احسن اقبال وزیراعظم شہباز شریف نا کلہو ءِ سر کرینے، وزیراعظم خواہک کہ پٹرولیم لیوی نا باندات آ مذاکرات سے شنبے آ مرے۔ لیاقت بلوچ پارے کہ جماعت اسلامی پٹرولیم لیوی و آئی پی پیز نا باندات آتیا حکومت تون مذاکرات کن کمیٹی اس جوڑ کرینے وخت اس کہ حکومت نا دا باندات آتیا اِرا کمیٹی جوڑ ءُ۔ پٹرولیم لیوی آ مذاکرات سے شنبے وخت اس کہ آئی پی پیز نا باندات آ مذاکرات چارشنبے آ مریک۔ او پارے کہ جماعت اسلامی الس آ بیٹ پٹرولیم لیوی نا چٹفنگ و بجلی نا بشخ اٹی آئی پی پیز تون تعلقدار باندات آتیا تینا موقف ءِ مذاکرات آتیٹی پیش کیک۔ یات سلے کہ داڑان مست جماعت اسلامی و حکومتی کمیٹی تا نیام اٹی پٹرولیم لیوی آ مذاکرات نا اِرا دور مسنو، لیاقت بلوچ نا کماشی ٹی جماعت اسلامی نا کمیٹی حکومت ءِ پٹرولیم لیوی نا چٹفنگ کن جامع سلاہ تسوسس، ہرانا حکومت نا کنڈ آن ہچ ءُ مدلل ورندی اس بتویسس۔ امیر جماعت اسلامی پاکستان حافظ نعیم الرحمن پیدوار کرینے کہ مذاکرات نا پن آ رے تے کننگپ۔ حکومت پٹرولیم لیوی ءِ چٹفے، اگہ دن متو تو 20 ستمبر آ اسلام آباد ناکنڈآ مارچ مریک۔