ہانگ کانگ نا ڈیجیٹل ٹیکنالوجی ٹی چاہنداری تیان ہیل کننگ خوانہ، جام کمال خان

ہانگ کانگ، بنجائی واپار وزیر جام کمال خان ہانگ کانگ جنرل چیمبر آف کامرس نا دورہ ءِ کرے و ہانگ کانگ جنرل چیمبر آف کامرس نا چیئرمین و کاروباری سرکڑدہ غاتتون اوڑدہی کرے۔ اوڑدہی اٹی پاکستان و ہانگ کانگ نا نیام اٹی واپاری و زرکاری تعلقداری تے شون تننگ آ جم گپ وتران کننگا۔ ہڑتوم آ ملک آتا کاروباری برادری تا نیام اٹی دراست حال حوال آتے ودفنگ آ زور شاغنگا۔ جام کمال پارے کہ نن ہانگ کانگ نا مالیات، ہوابازی و ڈیجیٹل ٹیکنالوجی ٹی چاہنداری آن فائدہ ہرفنگ خوانہ، بیلٹ اینڈ روڈ انیشی ایٹو تین پہ تینی کمکاری، رابطہ و ٹرانزٹ کسر تا شونداری نا بھلو وارخواہی فراوان کیک۔ جام کمال خان پاکستان و ہانگ کانگ نا نیام اٹی کاروباری ڈل آتا ہن وبر نا گرج آ زور شاغا و پارے کہ ہانگ کانگ جنرل چیمبر و پاکستان نا بھلا واپاری ادارہ غاتا نیام اٹ کمکاری ءِ ودفنگک۔ اوڑدہی ٹی ایف پی سی سی آئی، کراچی و لاہور چیمبر تتون حوال آتے ودفنگ نا گنجائشت آتیا ہم گپ و تران کننگا۔ واپار وزیرِ پارے کہ سوگو ادارہ ئی و کاروباری رابطہ غاک واپار و زرکاری نا پوسکن ؤ وارخواہی ودی کیرہ۔ جام کمال خان ہانگ کانگ اٹی پاکستانی کاروباری برادری و کمیونٹی نا کڑد انا ستا ءِ کرے۔ بنجائی واپار وزیرِ پاکستان کلب اٹی پنی آ پاکستانی کاروباری و کمیونٹی سرکڑدہ غاتتون ہم اوڑدہی کرے۔ جام کمال خان پارے کہ پاکستانی کمیونٹی ہانگ کانگ اٹی تینا رابطہ غاتا کمک اٹ پاکستان اٹی زرکاری نا شون اٹی تینا کڑد ءِ ادا کے، پردیسی پاکستانیک پاکستان و ہانگ کانگ نا نیام اٹ واپار و زرکاری نا شون تننگ نا پول ءُ۔