بیداد نا جاگہ غا قلم، بھسکاری نا جاگہ غا شونداری نا کسر ءِ ہرفوئی تمک،میر ضیاء لانگو

کوئٹہ، صوبائی وزیر داخلہ میر ضیاء اللہ لانگو پارینے کہ ننے بیداد نا جاگہ غا قلم، بھسکاری نا جاگہ غا شونداری و بدبیسئی نا جاگہ غا امن نا کسر ءِ ہرفوئی تمک، حکومت ہچ گہس مذاکرات آن نمن متنے ولے توفک نا زور آ مذاکرات آک ہچ وڑ اٹ مفسہ۔ دا خیال آتا درشانی ءِ او جتا جتا ڈَل آتتون ہیت وگپ کرسا کرے۔ او پارے کہ ننے داسہ دا شرہ غان پیش تموئی تمک کہ مذاکرات دیر تون مروئی ءِ و دیر تون آخا۔ بلکہ تینا چکار ءِ بلوچستان و پاکستان نا شونداری، امن، شونہالی و الس نا گچین آخبت آ کروئی تمک۔ ننے اوار مرسا دہشت گردی، بیداد و بدبیسئی ءِ مسترد کروئی تمک، ہرا بندغ آک ننا امن ءِ بھس کننگ، الس ءِ بشخنگ و کودک آ جان تے نسخان رسیفنگ خوارہ، اوفتا ارادہ غاتے سرسہب مننگ آن توروئی تمک۔ ننا اصل واک سیوت، تعلیم، خواری، پام و تینا وطن تون مہر ءِ‘ ورنا چین بایدے قلم ءِ تینا سلہہ جوڑ کیر، تعلیم دوئی کیر و پارلیمانی و جمہوری جہد انا کمک اٹ ملک و قوم انا مقدر ءِ بدل کننگ اٹی تینا کڑد ءِ ادا کیر۔ میر ضیاء اللہ لانگو پارے کہ دنیا نا شون ہلوک ملک آتے ہننگے ہراڑے الس تینا ریاست و آئینی ادارہ غاتتون اوار مرسا شونداری نا مزل تیا سر مسنے‘ دنیا ٹی دن ءُ ہچ ءُ درور اس ملپک ہراڑے ریاست و آئین نا برخلاف سلہہ ہرفوک آتا مون آ ریاستی نظام ءِ نزور کننگانے۔ مذاکرات نا درگہ غاک ہمو بندغ آتیکن ملنگرہ ہرافک پاکستان نا آئین و ریاستی نظام ءِ امنا کیرہ، ولے توفک، دہشت گردی و بیداد نا کمک اٹ تینا ہیت ءِ منفنگ نا موکل تننگ مفک۔ ننے بروک آ نسل تیکن اسہ ہندن ءُ بلوچستان و پاکستان اس جوڑ کروئی تمک ہراڑے امن، تعلیم، روزگار، شونداری و شونہالی مرے۔