پاکستان و جاپان نا نیام اٹ نوکاپ آن رکھ اکن گرانٹ نا معاہدہ غا دستخط

اسلام آباد، پاکستان و جاپان نا نیام اٹ نوکاپ آن رکھ انا ڈٹ اکن گرانٹ معاہدہ غا دستخط مس۔ وزارت اقتصادی باندات نا کنڈآن دوشنبے نادے جاری بیان نا رداٹ جاپان سندھ اٹ نوکاپ آن رکھ انا ڈٹ اکن 2.58 ارب جاپانی ین (16.4 ملین امریکی ڈالر) نا گرانٹ فراوان کیک۔ ڈٹ انا مسخت سندھ اٹی نوکاپ آن بچفنگ نا بنداوی پنجر ءِ سوگو کننگ ءِ، ڈٹ آن نوکاپ نا خطرہ غاتا گواچی آبادی تا قدرتی آفت آتتون مون تننگ نا لائخی ٹی ودکی مریک۔ ڈٹ انا رداٹ لاڑکانہ ٹی سندھ دریاب نا راستی کنڈ آ ساڑی اولڈ آباد بند ءِ گچین و سوگو کننگک، وزارت اقتصادی باندات نا رداٹ ایکسچینج آف نوٹس و ریکارڈ آف ڈسکشن آ سیکرٹری اقتصادی باندات محمد حمیر کریم و پاکستان اٹ جاپان نا سفیر اکاماتسو شوئچی دستخط کریر، گرانٹ معاہدہ غا ایڈیشنل سیکرٹری اقتصادی باندات سبینہ قریشی و جاپانی شونداری ادارہ جائیکا نا سینئر نمائندہ سوگاوارا تاکایوکی دستخط کریر۔ سیکرٹری اقتصادی باندات دا وخت آ پارے کہ جاپان پاکستان نا متکن و قابلِ قدر شونداری شریدار ءِ و جاپان نا پدریسہ سنگتی و شونداری کمکاری قدر کڑزک۔ او پارے کہ پاکستان نا راجی و اقتصادی شونداری کن جاپان نا مدامگی عزم انا ستاءِ کینہ۔ پاکستان اٹ جاپان نا سفیر دا وخت آ پارے کہ پاکستان تون سنگتی تعلقداری و ہڑتوم آ کنڈ آتا کمکاری ءِ پین سوگو کینہ۔