1965 نا جنگ اٹی پاک فضائیہ نا قربانیک قومی تاریخ نا گمر ءُ،سردار ایاز صادق

اسلام آباد، قومی اسمبلی نا اسپیکر سردار ایاز صادق یومِ فضائیہ نا وخت آ پاک فضائیہ نا شہید، غازی و شاہین تے خراجِ عقیدت پیش کرسا پارینے کہ پاک فضائیہ ملکی وتواجہی، قومی سلامتی و فضائی دنگ انا دفاع ٹی مدام بھلوجیرت، کسبی چاہندری و حب الوطنی نا درشانی ءِ کرینے۔ او پارے کہ پاک فضائیہ نا شہید و غازی تا قربانیک قومی تاریخ نا گمرکروک ءُ بشخ اسے ءُ، قوم تینا دا بہادر گلزادہ غاتا قربانی و شجاعت ءِ مدام یات تخک۔ دوشنبے نادے آ یومِ فضائیہ نا وخت آ تینا کلہو اٹ اسپیکر سردار ایاز صادق پارے کہ 1965 نا جنگ اٹ پاک فضائیہ کچ اٹنگا وسیلہ غاتیان پد ہم تینا کسبی برتری، جیرت و جنگی چاہنداری نا گچین درشانی ءِ کرسا ملکی فضائی دنگ انا بھاز جوان وڑ اٹ رکھ ءِ کرے و دشمن نا فضائی جلہو آتا پبی مون ءِ تورے۔ پاک فضائیہ نا شاہین تا بہادری، عزم و قربانی وطن نا دفاع نا تاریخ اٹ اسہ گیرام مفروک بشخ اس نوشتہ کرے و مچ آ قوم انا حوصلہ غاتے بڑز کرے۔ اسپیکر سردار ایاز صادق پارے کہ ایئر مارشل نور خان 1965 نا جنگ اٹی پاک فضائیہ نا کماشی ءِ سرکڑدہ ئی لائخی، کسبی بصیرت و سوگو عزم اتون کرے۔ اونا گچین کماشی ٹی پاک فضائیہ دشمن نا مون اٹ گچین کارکڑد نا درشانی ءِ کرے و تینا جنگی لائخی تے منفے۔ او ایم ایم عالم نا جیرت و جنگی چاہنداری ءِ خراجِ عقیدت پیش کرسا پارے کہ اسہ فضائی معرکہ اسے ٹی دشمن نا پنچ جہاز آتے خلنگ بِٹنگ اونا بے مثل کسبی لائخی و بہادری نا روشنا درور ءِ۔ او پارے کہ 1965 نا فضائی معرکہ غاتیٹی پاک فضائیہ نا پائلٹ و ایلو کارندہ غاک جانفشانی، بے مثل جیرت و جوزہ شہادت نا درشانی ءِ کرسا وطن نا دفاع کن بے مٹ درور اس جوڑ کریر۔