اسپیکر ایرانی پارلیمنٹ نا دھڑکو،ایران نا میرات آک شست مسر تو امریکی تیل و گیس میرات آک ہم بچپسہ
ڈیہہ انا دیر و تنصیب آتیٹی ساڑی امریکی تیل و گیس کمپنیک ہم ساڑی حالیت اٹ گڑتی نا باٹی اریر، باقر قالیباف
Get real time updates directly on you device, subscribe now.
تہران، ایرانی پارلیمنٹ نا اسپیکر محمد باقر قالیباف امریکہ ءِ خبردار کرینے کہ اگہ ایران نا میرات آتے شست کننگا تو ڈیہہ اٹی ساڑی امریکی تیل و گیس انا میرات آک بچنگ کپسہ۔ قالیباف سوشل میڈیا پلیٹ فارم ایکس آ تینا کلہو اٹی پارے کہ ڈیہہ انا دیر و میرات آتیٹی ساڑی امریکی تیل و گیس کمپنیک ہم ساڑی حالیت نا گڑتی تا باٹی ءُ۔ او پیدوار لوز آتے ٹی پارے کہ اگہ ایران نا میرات آتیا جلہو کننگا تو اونا ورندی ءِ تننگک۔ ایرانی پارلیمنٹ نا اسپیکر دعویٰ کرے کہ ایران مہالو ہم تینا ورندی کارروائی نا لائخی ءِ پک کرینے، ولے او ہمو اڈہ غاتا جم تا بابت پاتو ہرافتا بابت اوپارے کہ او داسہ کاریم نا وڑ اٹ سلتنو۔ قالیباف نا دا بیان امریکی وزیر دفاع پیٹ ہیگسیتھ نا ہمو دھڑکو آن پد مون آ بس ہراٹی او پاریسس کہ اگہ ایران امریکی بحریہ نا جہاز آتیا جلہو آتے برجا تخا تو امریکہ ایرانی تیل ہرفوک ٹینکر آتے بھس کننگ کیک۔ پوسکن آ بیان تیان ایران و امریکہ نا نیام اٹی چک و تاڑ پین ودنگ نا گمان ودی مسنے، وخت اس کہ آبنائے ہرمز اٹی بحری ہن وبر و جہانی تیل انا فراوانی مہالو آن ویل آتا گواچی ءِ۔ رائٹرز نا رداٹ ساڑی چک و تاڑ آن پد آبنائے ہرمز آن واپاری جہاز آتا ہڑدے ئی ہن وبر کساس 10 جہاز اسکان شیف بسنے۔ ایرانی بحریہ نا کمانڈر ریئر ایڈمرل شہرام ایرانی خبردار کرینے کہ سلہہ بند فوج گرج مننگ آ دشمن ءِ ہر ہند آ ژند کننگ نا بود تخک۔ ایرانی خبر رساں ادارہ نا رداٹ شہرام ایرانی پارے کہ دشمن ایرانی سلہہ بند فوج انا آپریشنل کارروائی تیان بھاز فریشان ءِ وخت اس کہ ایرانی بحریہ نا کارروائی تا سوب آن گڑاس دشمن جنگی جہاز آتا آپریشنل لائخیک ہم زہمی مسر۔ او پارے کہ سلہہ بند فوج انا بنداوی مسخت دشمن ءِ تینا مسخت آتے دوئی کننگ آن توننگ ءِ و دشمن نا ہن وبر آ چکار تخنگ انگ ءِ۔ شہرام ایرانی سلہہ بند فوج آ بروک گمانی جنگ اکن تیار مننگ آ زور شاغسا پارے کہ دشمن ایرانی سلہہ بند فوج انا آپریشنل لائخی تیٹی مروک شونداری آن بھاز فریشان ءِ و گرج تمنگ آ نن اودے ہر ہند آ ژند کننگ کینہ۔ ایرانی وزارت خارجہ نا ترجمان اسماعیل بقائی پارینے کہ امریکہ و اسرائیل نا جلہو آن مست آبنائے ہرمز پورو وڑ اٹ ملوک ئس۔ اسماعیل بقائی پارے کہ امریکہ ڈیہہ آ کانود آن چَپ و بیدادی جنگ اس بیٹ کرے، ہرانا رند اٹ واپاری جہاز رانی نا نظام زہمی مس و توانائی نا نہاد آتیٹی ودکی مننگ اٹی ءِ۔ ترجمان پارے کہ امریکہ دنیا نا مون آ تینا ودی کروک اڑاند آتے ایران نا پن آ کننگ نا کوشست کننگ اٹی ءِ و تینا بنا کروک جنگ انا سوب ایران نا وڑ و ڈول ءِ گوندنگ خواہک۔ اسماعیل بقائی پارے کہ امریکہ جنگ ءِ تینٹ بنا کرسا اونا زرتس آتے مچ آ دنیا غان ہلنگ نا اومیت کننگ اٹی ءِ۔ امریکہ نا کنڈ آن بیرہ ایران ءِ ڈیہہ اٹ گڑتی و بے چیٹی نا زموار گوندنگ راستکی تیان چَپ ءِ۔