خواست آک متوس تو ہچ ءُ گاڈی اس چلینگپک ہچ ءُ پٹرول پمپ اس ملنگپک،حافظ نعیم الرحمن

اسلام آباد، امیر جماعت اسلامی حافظ نعیم الرحمن پارینے کہ پیٹرولیم لیوی نا چٹفنگ و لس الس ءِ ریلیف رسیفنگ اسکان او آرام اٹ تولپک۔ اگہ حکومت ننا خواست آتے امنا کتو تو پورو پہیہ جام ہڑتال مریک، ہراٹی ہچ ءُ گاڈی اس سڑک آ مفک و نئے پیٹرول پمپ اس ملوک مریک۔ حکومت ءِ پدی مروئی تمک و پٹرولیم لیوی ٹیکس ءِ چٹفوئی تمک‘ اگہ مافیاک دا السی تحریک ءِ لتاڑ کننگ نا کوشست کریر تو اوفتے الس نا مون آ پاش کننگک۔ تدوک آ دے اسلام آباد اٹی پریس کانفرنس آن تران کرسا حافظ نعیم الرحمن پارے کہ تدوک آ نن سوات اٹی اسہ بھلو جلسہ کرین و ہنداکان دھرنا نا باقاعدہ بنا مسنے۔ او پارے کہ مچ آ ملک اٹی ہڑتال نا سوب آن جم وڑ اٹ اسہ گچین چاگڑد اس جوڑ مس، اخیر حکومت ءِ ہم دا ہیت انا درک لگا کہ الس اٹی خار و بدبیسئی نا جوزہ تالان ءِ و اونا مون ءِ توننگ وس آن پیش مننگ کیک‘ ہندا خلیس آن پد حکومت حوال کرے، ایہن تو دا گام ءِ بایدے مہالو ہرفوئی ئس۔ او پارے کہ ایلودے آن ٹیکنیکل کمیٹی نا کہول آ ہیت و گپ نا باقاعدہ بنا مریک۔ حافظ نعیم الرحمن پارے کہ حکومت الس ءِ دراست ریلیف فراوان کروئی ئس ولے اوفتا تینا اسہ وڑوڈول اسے‘ حکمران آتا اختہ ئی ہم السی ویل آتیان زیات ءُ، دا دے ٹی حکومت پاکستان نا مچ آ چکار پاکستان آن زیات لندن آٹے۔ حکمران آک السی ویل آتا ایسری نا جاگہ غا جہاز تے ٹی تولسا پیشن ملک آتیا کارہ۔ امیر جماعت اسلامی جہانی مارکیٹ اٹی تیل انا ودک آ نہاد آتا ذکر ءِ کرسا پارے کہ ہراتم جہانی مارکیٹ اٹی نہاد آک کم مریرہ تو اونا کچ آ فائدہ الس ءِ رسینگپک۔ پٹرول نا نہاد نا ودکی آن پد ہر کنوئی آ گڑا‘ کرا ودک والس آ باریم ودک۔ او حکومت ءِ پیدوار پارے کہ الس ءِ آسودہی نا فراوانی اسکان دھرناک برجا سلرہ۔