بلوچستان اٹی ہچ ءُ نو گو ایریا اس اف و صوبہ نا الس ریاست و سیکورٹی فورس آتتون ہم کوپہ سلوک ءِ، میر سرفراز بگٹی

قطبی ڈیرہ بگٹی، وزیراعلیٰ بلوچستان میر سرفراز بگٹی جتا جتا ضلع غاتیان بروک شاری تا ویل آتے دراست خف تورے و تعلقدار کمامدار آتے اوفتا دمدستی ایسری کن المی گام گیج کننگ نا پارت کرے۔ دا وخت آ وزیراعلیٰ قبائلی متبر آتتون ہم اوڑدہی کرے و علاقہ نا ویل، شونداری گرج و الس ءِ مون تروک مشکل آتیا گپ وتران کرے۔ وزیراعلیٰ میر سرفراز بگٹی پارے کہ السی ویل آتا ایسری و بنداوی آسراتی تا فراوانی حکومت نا اولیت آتیٹی اوار ءِ۔ غاو دیوان تا مسخت الس ءِ تینا غاو تے دراست حکومتی سرکڑدہ غاتسکان رسیفنگ نا وارخواہی فراوان کننگ و تعلقدار محکمہ غاتے ویل آتا ایسری کن پرسجو جوڑ کننگ ءِ۔ او کمامدار آتے پارت کرے کہ شاری تا غاو تیا دمدستی کارروائی کننگے و السی ویل آتا ایسری ٹی ہچ وڑ انا سستی یا ہُرے کننگپ۔ وزیراعلیٰ پارے کہ بلوچستان اٹی ہچ ءُ نو گو ایریا اس اف و صوبہ نا الس ریاست و سیکورٹی فورس آتتون ہم کوپہ سلوک ءِ۔ او پارے کہ صوبہ ٹی حکومتی و اپوزیشن جماعت آتا اسمبلی باسک آک تینا حلقہ غاتیٹی باقاعدگی اٹ کارہ و علاقائی دود و ربیدگی غاتا سرجز آتیٹی بشخ ہلسا الس تون رابطہ ٹی مریرہ۔ علاقائی شونداری و رابطہ سڑک آتا اہمیت آ ہیت کرسا وزیراعلیٰ پارے کہ پنجاب نا علاقہ تونسہ ءِ بلوچستان تون گنڈوک آ شاہراہ کن بنجائی حکومت آن فنڈ جاری کننگ کن کوشست کننگ انگ ءِ۔ ہندا وڑ چھپر قومی شاہراہ غان کھرڑ بزدار اسکان سڑک نا تفنگ کن سروے نا پرمان جاری کننگانے۔