کشاری برآمدات آتیٹی ودکی زرگزرانی وتواجہی کن المی ءِ،احسن اقبال

اسلام آباد، بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ پاکستان ءِ 2035 اسکان اسہ ٹریلین ڈالر نا زرگزران جوڑ مننگ کن برآمد آتیٹی نمان ودکی کروئی مریک، وخت اس کہ زرگزرانی وتواجہی نا دوئی کننگ کن برآمدی بشخ ءِ پوسکن آ خواست آتتون ہم گرنچ کننگ المی ءِ۔ او دا خیال آتا درشانی ءِ پاکستان نا کشاری برآمد آن پبی فائدہ ہرفنگ نا بابت اڈ ہلوک گول میز کانفرنس آن تران کرسا کرے۔ احسن اقبال پارے کہ ”اڑان پاکستان“ نا ہدف آتا دوئی کننگ کن برآمد آتیٹی ترندی اٹ ودکی المی ءِ۔ دنیا نا شون ہلوک ملک آک برآمد ءِ ودفسا مدامگی اقتصادی شونداری دوئی کریر، وخت اس کہ پاکستان نا برآمد آتیٹی درکار ودکی مفننگ زرگزرانی تنکی نا بھلا سوب آتیٹی اوار ءِ۔ بنجائی وزیر پارے کہ برآمد آتیٹی جوان ودکی مفننگ نا سوب آن پاکستان ءِ وار وار سنگت ملک و آئی ایم ایف آ ہنوئی تمک، ولے وار وار آئی ایم ایف آ ہِننگ زرگزرانی ویل آتا آخبتی ایسر اف۔ وام ہلسا زر مبادلہ نا گرج آتے پورو کننگ وختی ایسر ءِ، آخبتی درمان اف۔ او پارے کہ پاکستان ءِ 100 ارب ڈالر نا برآمدی ہدف نا کنڈ آ ہنوئی مریک، ایلو دروشم اٹی ملک زرگزرانی مشکل آتیان آخبتی وڑاٹ پیش تمنگ کپک۔ ورنا آبادی ءِ مون آ تخسا پاکستان ءِ 6 آن 8 درسد زرگزرانی ردوم کچ دوئی کروئی مریک۔ احسن اقبال پارے کہ سیاسی نزوری و پالیسی تا ریسہ ٹیکمتی پاکستان نا شونداری ءِ زہمی کرے۔ زرگزرانی شونداری کن کم از کم دہ سال اسکان پالیسی تا ریسہ المی ءِ۔ او پارے کہ وژن 2010 و وژن 2025 کون آ ڈٹ آک ہم پالیسی ریسہ مفننگ نا سوب آن درکار بھرم دوئی کننگ کتوس۔ کشاری بشخ انا بابت بنجائی وزیر پارے کہ کشت وکشار پاکستان نا زرگزران نا مخ ءِ، ولے کشاری ملک مننگ آن پد ہم کشاری گڑاتا درآمد پاکستان کن بھلو المیہ اسے۔