قلات و بھاگ کچھی ٹی سیکورٹی فورس آتا سرسہب کارروائیک ستا کڑزرہ،وزیراعلیٰ بلوچستان
بلوچستان نا امن کن سیکورٹی فورس، پولیس و اے ٹی ایف نا خذمت و قربانیک گمر ی ءُ، سرفراز بگٹی
Get real time updates directly on you device, subscribe now.
کوئٹہ /اسلام آباد، وزیراعلیٰ بلوچستان میر سرفراز بگٹی قلات اٹی سیکورٹی فورس وخت اس کہ بھاگ کچھی ٹی بلوچستان پولیس و اے ٹی ایف نا سرسہب کارروائی تا ستاءِ کرسا پارینے کہ سیکیورٹی ادارہ غاتا وخت آ و گچین کارروائی امن دُشمن زموار آتا برخلاف ریاست نا سوگو عزم انا ڈیک ءِ۔ وزیراعلیٰ ہاؤس آن تینا بیان اٹی وزیراعلیٰ بلوچستان پارے کہ بلوچستان نا امن کن سیکورٹی فورس، پولیس و اے ٹی ایف نا خذمت و قربانیک گمری ءُ۔ بلوچستان پولیس و اے ٹی ایف بھاگ کچھی ٹی اسہ وار ولدا تینا کسبی لائخی تا درشانی ءِ کریر۔ میر سرفراز بگٹی پارے کہ دہشت گرد آک بلوچستان نا امن، شونداری و شونہالی ءِ نسخان رسیفنگ اٹ وخت اس ہم سرسہب مفسہ، دہشت گردی نا برخلاف جنگ مچ آ قوم انا اسیجائی جنگ ءِ و دا جنگ اٹ الس و ریاستی ادارہ غاک اسیجاءُ۔ او پارے کہ حکومت امن دشمن زآتا برخلاف زیرو ٹالرنس نا پالیسی آ عمل کننگ ءِ و دہشت گردی نا پورو چٹفنگ اسکان کارروائیک برجا سلرہ۔ ریاست نا رٹ ءِ چیلنج کروک زموار آتتون ہچ رعایت کننگپک۔ وزیراعلیٰ بلوچستان قلات و بھاگ کچھی نا کارروائی تیٹی بشخ ہلوک افسر وورناتے خراجِ تحسین پیش کرسا پارے کہ قوم تینا بہادر سیکورٹی کارندہ غاتا قربانی و خذمت آتے شرف ایتک۔ داکان بیدس بنجائی وزیر ریلوائی محمد حنیف عباسی بلوچستان نا علاقہ قلات اٹ سیکورٹی فورس آتا سرسہب انٹیلی جنس بیسڈ آپریشن نا ستاءِ کرسا فورس آتا کسبی لائخی تے خراج تحسین پیش کرینے، تینا اسہ بیان اسے ٹی بنجائی وزیر پارے کہ قلات اٹ فتنۃ الخوارج نا 12دہشت گرد ءِ دوزخی کننگ سیکورٹی فورس آتا بھلو و نمان سرسہبی اسے۔ او پارے کہ دہشت گردی نا برخلاف جنگ اٹ سیکورٹی فورس آتا شجاعت، بہادری و قربانی مچ آ قوم اکن گمرنا سوب ءُ، سیکورٹی فورس آک اسہ وار ولدا پک کریر کہ او ملک انا رکھ و سوگوی کن ہر قربانی ءِ تننگ کن تیار ءُ۔ محمد حنیف عباسی زور شاغا کہ پاکستان نا ڈغار آ دہشت گردی و انتہا پسندی کن ہچ ءُ جاگہ اس اف و ریاست دشمن زموارآتے ہر کہول آ پورو وڑاٹ چٹفنگک۔ او عزم انا درشانی ءِ کرے کہ فتنۃ الخوارج و اوفتا کل کمکار آتا برخلاف فیصلہ ئی کارروائی بے سلنگ آن برجاسلک و دہشت گردی نا پورو چٹفنگ اسکان دا جنگ برجا سلک۔ بنجائی وزیر ریلوائی پارے کہ ”عزم استحکام“ نا قومی وژن نا رداٹ دہشت گردی نا ناچوڑ ءِ ماس کش کننگ کن مچ آ قوم و سیکورٹی فورس آتا عزم نزور مفروک و اسٹ ءِ۔