بلوچستان اٹی سیکورٹی فورس آتا آپریشن، 21 دہشت گرد خلنگار،آئی ایس پی آر

راولپنڈی، بلوچستان اٹی سیکورٹی فورس آک دہشت گرد آتا برخلاف بھرمی و گچین کارروائی کرسا 21 دہشت گرد ءِ خلکر۔ آئی ایس پی آر نا رِداٹ 31 اگست ویکم ستمبر نا نیامی نن ضلع چاغی نا علاقہ نوکچا و ضلع پشین نا علاقہ زیارت کراس اٹی دہشت گرد تا برخلاف جتا جتا کارروائی کننگا۔ ضلع چاغی ٹی فتنہ الہندوستان نا دہشت گرد آک این-40 (N-40) کوئٹہ-تفتان شاہراہ آ کانود آن چَٖپ ناکلہ خلسا مسافر آتیان بھتہ ہلنگ نا کوشست کریرہ‘ ہرافتا برخلاف ترند کارروائی ٹی 11 دہشت گرد خلنگار۔ ضلع پشین ٹی فتنہ الخوارج نا دہشت گرد آک کسٹمز ہاؤس آ جلہو کریر‘ ہرانا سیکورٹی فورس آک پبی سم کاری ٹی نا کمک اٹ ورندی تسر۔ ہڑتوم آ کنڈآن بھاز سم کاری ٹی 10 دہشت گرد دوزخی مسر۔ آئی ایس پی آر نا رِداٹ کارروائی نا وخت آ دہشت گرد آتیان بھلو کچ اسے ٹی سلہہ، منچر دوئی کننگا۔ ہڑتوم آ کنڈآن سم کاری ٹی ملک انا 6 بہادر ورنا شہید مسر‘ ہرافتے ٹی اِرا عسکری افسر و کسٹمز نا اسہ سرکاری کارندہ اس ہم اوار ءِ۔ آئی ایس پی آر پارینے کہ مچ آ علاقہ غان ایلو سلوک دہشت گرد آتے چٹفنگ کن سرچ آپریشن برجا ءِ۔ عزمِ استحکام و نیشنل ایکشن پلان نا رِداٹ دہشت گردی نا پورو چٹفنگ اسکان دا کارروائیک برجا سلرہ۔ دا رد اٹ وزیراعلیٰ بلوچستان میر سرفراز بگٹی چاغی نا علاقہ نوکجا و پشین نا علاقہ زیارت کراس اٹی سیکورٹی فورس آتا کارروائی تا ستاءِ کرسا 21 دہشت گرد خلنگ آ است جمی نا درشانی ءِ کرے۔ وزیراعلیٰ پارے کہ دہشت گرد آک قومی شاہراہ تیا الس نا پرامن ہن وبر اٹ اڑاند شاغنگ و کسٹمز کمامدار آتے زمواری تا سرتننگ آن توننگ نا پراگندہ کوشست کریر، ولے سیکورٹی فورس آک وخت آ وبھرمی کارروائی کرسا دہشت گرد آتا ارادہ غاتے بے سہب کریر۔ میر سرفراز بگٹی پارے کہ دہشت گردی و ڈوہ تا اسیجائی ءِ ہچ ءُ وڑ اسے ٹی سگنگ مفک۔ ایلو کنڈ آ وزیراعلیٰ بلوچستان نا کمکار حوالکاری و سیاسی باندات شاہد رند پارے کہ نوکچہ، چاغی و زیارت کراس پشین اٹی سیکورٹی فورس آتا کارروائی ستا کڑزک۔ 21 دہشت گرد ءِ خلنگ امن دشمن آتا برخلاف ریاست نا سوگو آ عزم نا پاش شاہدی ءِ۔ دہشت گرد آک قومی شاہراہ تیا مسافر تا ہن وبر اٹی اڑاند و کسٹمز کمامدار آتے ڈیوٹی نا سر تننگ آن توننگ نا کوشست کریر، ولے سیکورٹی فورس آک وخت آ کارروائی نا کمک اٹ اوفتا ارادہ غاتے مِش تاکریر۔ شاہد رند تینا بیان اٹی پارے کہ شہید آک راج انا نہادی میرات ءُ، زمواری تا سر تننگ ناوخت آ شہید مروک فورس کارندہ و کسٹمز کمامدار آتا قربانیک ہچ گیرام کننگپسہ۔ دہشت گردی و ڈوہ تا اواری ہچ گہس امنا کننگ مفک۔ بلوچستان اٹی امن و الس نا جان و مال انا رکھ اکن کانود نافذ کروک ادارہ غاک پورو وڑ اٹ متحرک ءُ۔ بلوچستان نا غیرتی الس دہشت گردی نا برخلاف جنگ اٹی ریاست و سیکورٹی فورس آتتون ہم کوپہ سلوک ءِ۔ درملکی کاٹم خواجہی و مخ تفی اٹ کاریم کروک دہشت گرد آتا برخلاف کارروائیک بے فرق آن برجا سلرہ۔ عزمِ استحکام نا رِداٹ دہشت گردی نا پورو چٹفنگ و مریس مدی امن کن حکومت بلوچستان تینا کڑد ءِ پدریسہ ادا کرسا کیک۔