سندھ طاس معاہدہ نا بابت جہانی ثالثی عدالت نا فیصلہ ستا کڑزک،وزیر اعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی سندھ طاس معاہدہ نا حیثیت نا بابت جہانی ثالثی عدالت نا امنائی فیصلہ نا ستاءِ کرسا اودے پاکستان نا موقف نا اہم کانودی و سفارتی سرسہبی گوندانے۔ وزیر اعلیٰ پارے کہ جہانی ثالثی عدالت نا امنائی فیصلہ دا ہیت انا پیدوارتوثیق ءِ کہ بھارت سندھ طاس معاہدہ ءِ تینا خودآن معطل، چٹفنگ یا ”پد بٹنگ“ کپک، معاہدہ پدریسہ نافذ العمل و بھارت کن کانودی وڑ اٹ پابند ءِ۔ میر سرفراز بگٹی پارے کہ عدالت بھارت نا کنڈآن معاہدہ نا معطلی یا چٹفنگ کن پیش کروک آ چندی سوب‘ ہرافتے ٹی وتواجہی، پاکستان نا کنڈآن پاننگوک خلاف ورزی، دہشت گردی، حالیت آتیٹی بدلی، سلہہ بند جھیڑہ و ورندی گام گیج آک اوار ئسر، ءِ امنا کتو۔ عدالت پیدوار کرینے کہ سندھ طاس معاہدہ ٹی ترمیم یا اونا چٹفنگ بیرہ پاکستان و بھارت نا تین پہ تینی منشا اٹ اسہ پوسکن ءُ معاہدہ اسے نا کمک اٹ مننگ کیک۔ او پارے کہ سندھ دریاب نا دیر تا پاکستان نا متکن آحق و فائدہ غاتا رکھ اکن دا فیصلہ بھاز اہم ءِ و داڑان جہانی معاہدہ غاتا پوروی و جہانی کانود نا بالادستی نا اصول پین سوگو مسنے۔ وزیر اعلیٰ بلوچستان پارے کہ رتلے ہائیڈرو الیکٹرک ڈٹ انا بابت ہم عدالت نا کنڈآن پاکستان نا درخواست آ نیمہ گام گیج آتا منظوری اہم پیش رفت اسے۔ بھارت ءِ ڈیم انا دیوال و پاور انٹیک اسٹرکچر نا خاص بشخ آتیا پک کروک کہول آن زیات کنکریٹنگ آن توننگانے وخت اس کہ پروجیکٹ نا تعمیراتی شیڈول اٹی مروک آ بدلی تا بابت رپورٹ پیش کننگ نا ہم پابند کننگانے۔ میر سرفراز بگٹی پارے کہ دا پابندیک نیوٹرل ایکسپرٹ نا گڈیکو فیصلہ نا 90 دے آن پد اسکان برجا سلرہ، ہرا گمانی وڑ اٹ جولائی 2027 ٹی مون آ بریک۔ او پارے کہ پاکستان مدام جہانی کانود، معاہدہ غاتا و مذاکراتی عمل آ یخین نا درشانی ءِ کرینے و داسہ نا فیصلہ دا اصول نا سرسہبی ءِ کہ اسہ ہم جہانی معاہدہ اسے تینا خودآن تینا منشا اٹ معطل یا چٹفنگ مفک۔ وزیر اعلیٰ پارے کہ انصاف غالب بسنے و جہانی ثالثی عدالت نا دا امنائی فیصلہ پاکستان نا کانودی موقف نا سوگوی نا درشانی ءِ۔ پاکستان تینا آبی حق آتا رکھ و جہانی معاہدہ غاتا پاسداری کن بروک آ وخت آتیٹی ہم ہر کانودی و سفارتی فورم آ گچین کڑد ادا کرسا کیک۔