بسیمہ نا چندی فٹبال کلب آتا کنڈ آن گوازی کروک آتے وردی تننگا،ایم پی اے زابد علی ریکی نا پارت

بسیمہ ٹی گوازی خاص وڑ اٹ فٹبال نا شون تننگ‘ ورنا گوازی گر تا است بڈی و ہندی فٹبال کلب آتے آسراتی تا فراوانی نا رد اٹ اسہ اہم و ستا کڑزوک ءُ گام اس مونی بسنے، ہراڑے ایم پی اے واشک زابد علی ریکی، میر خدائے رحیم عیسیٰ زئی و اسپورٹس آفیسر واشک نا کنڈ آن بسیمہ نا جتا جتا فٹبال کلب و ٹیم تے فٹبال نا وردی فراوان کننگا۔ وردی تا بشخ و پانٹ نا بابت جنگل ریسٹ ہاؤس بسیمہ ٹی اسہ دود (تقریب) اس اڈ ہلک، ہراٹی سینئر فٹبالر محمد اسلم عیسیٰ زئی، سیکرٹری سلام عیسیٰ زئی، کیپٹن نذیر، کیپٹن قاسم، اعجاز حسین بادینی، کیپٹن ادریس، کیپٹن نعمت، کیپٹن میر احمد شوہاز، کیپٹن نصیب اللہ و گوازی تتون تعلقدار ایلو شخصیت آک بشخ ہلکر۔ دود انا وخت آ جتا جتا فٹبال ٹیم تا کپتان تیٹی گوازی نا وردی بشخنگا، ہراڑان ہندی گوازی گر و گوازی تتون تعلقدار تپہ غاک خوشی واست جمی نا درشانی ءِ کرسا دا گام ءِ ورنا تا است بڈی کن بھاز جوان گوندار۔ دا وخت آ گوازی تتون تعلقدار شخصیت آک پاریر کہ بسیمہ ٹی فٹبال نا گوازی بھلو وخت اسے آن ورنا تے ٹی بھاز پنی ئس۔ کچ اٹنگا وسیلہ و آسراتی تا کمتی آن پد ہم ہندی گوازی گرک تینا خواری‘ جوزہ و لائخی تا کمک اٹ جتا جتا کہول تیا تینا پجار ءِ جوڑ کننگ نا کوشست کننگ اٹی ءُ۔ دا وڑ انا حالیت آتیٹی فٹبال کلب آتے گوازی نا گڑا و وردی تا فراوانی نئے بیرہ گوازی گر تا است بڈی ءِ بلکہ داڑان ورنا چین ءِ دراخ جوڑ سرجز نا کنڈ آ دننگ اٹ ہم کمک رسینگک۔ بشخ ہلوک آک خاص وڑ اٹ سینئر فٹبالر کیپٹن محمد اسلم عیسیٰ زئی نا کڑد انا ستاءِ کرسا پاریر کہ بسیمہ ٹی گوازی تا شون تننگ و فٹبال نا گوازی گر تا است بڈی کن کیپٹن محمد اسلم عیسیٰ زئی مدام مثبت، سِخت اٹ و فعال کڑد ادا کرینے۔ او بیرہ گراؤنڈ اٹی گوازی کننگ اسکان تینے کچ اٹ تختنے بلکن ورنا گوازی گر تے اسٹ کننگ، فٹبال کلب آتے متحرک کننگ‘ گوازی تا ویل آتے پیدوار کننگ و تعلقدار کمامدار آتسکان گوازی گر تا توارءِ رسیفنگ کن پدریسہ کوشست کرینے۔ ترانکار آک پاریر کہ کیپٹن محمد اسلم عیسیٰ زئی نا ہمو سینئر فٹبالر آتیٹی حساب مریک ہرافک تینا جندی فائدہ غاتیان ایڑتر مرسا بسیمہ نا ورنا تا گوازی کن تینا کل توانائی تے کاریم اٹ ایسنو۔ اونا گچین آ کڑد دا سوب آن ہم اہم ءِ کہ پوسکن آ نسل نا گوازی گر تا است بڈی ءِ کرسا اوفتے گوازی نا پڑ اتون گنڈوک نا کوشست کرے و جتا جتا فٹبال ٹیم تا نیام اٹی رابطہ و تین پہ تینی کمکاری ءِ شون تس۔ بشخ ہلوک آک پاریر کہ فٹبال بیرہ اسہ گوازی اس اف بلکہ ورناتے مثبت، دراخ جوڑ و تعمیری سرجز آتتون گنڈنگ نا اسہ بھرمی ءُ وسیلہ اسے۔ اگہ ہندی کہول آ گوازی تا گراؤنڈ، المی گڑا‘ کوچنگ، ٹورنامنٹ و ایلو بنداوی آسراتی تے فراوان کننگے تو بسیمہ نا لائخ آ ورناک ضلع، ڈویژن و صوبائی کہول آ نمان کڑد نشان ترسا مونی بریرہ۔ بسیمہ (نامہ نگار)