سندھ طاس معاہدہ غا جہانی ثالثی عدالت نا فیصلہ پاکستان نا تاریخی سرسہبی ءِ،میر ضیا اللہ لانگو

کوئٹہ، بلوچستان نا وزیر داخلہ میر ضیاء اللہ لانگو پارینے کہ جہانی ثالثی عدالت اٹ بھارت نا برخلاف پاکستان ءِ تاریخی سرسہبی مس، عدالت سندھ طاس معاہدہ ءِ برجا تخسا پاش کرینے کہ بھارت جہانی کانود و ضابطہ غاتا پابند ءِ۔ دا خیال آتا درشانی ءِ او اے پی پی تون ہیت وگپ کرسا کرے۔ میر ضیاء اللہ لانگو پارے کہ جہانی ثالثی عدالت پاکستان نا موقف ءِ امنا کرینے و بھارت نا پاکستان نا برخلاف جتا جتا بنداو آتیا کننگوک دعویٰ تے مسترد کرینے، او پارے کہ عدالت پاش کرینے کہ سندھ طاس معاہدہ ٹی بدلی یا ترمیم کننگ آ پوسکن معاہدہ کروئی مریک۔ وزیر داخلہ پارے کہ دا فیصلہ غان پاکستان نا دا موقف پاش وڑ اٹ امنا مسنے کہ بھارت پاکستان نا آبی نظام اٹ اڑاند ودی کننگ کن دن ءُ ہچ ءُ گام اس یا وڑ اس کاریم اٹ اتنگ کپک ہرا پاکستان نا دیر انا نظام ءِ زہمی کے۔ او پارے کہ جہانی ثالثی عدالت نا فیصلہ غان پاکستان نا دیر انا حق و موقف ءِ سوگوی رسینگانے و دا اہم سفارتی و کانودی سرسہبی ءِ۔ میر ضیاء اللہ لانگو پارے کہ قوم ہموقومی ہیرو تیا گمر کے ہرافک پاکستان نا موقف ءِ جہانی کہول آ سوگو و پبی وڑ اٹ پیش کریر و ملک انا روادیر انا حق آتا دوئی کننگ کن گچین وڑ اٹ مقدمہ تون مون تسر۔