براہوئی زبان نا شونداری و تالانی ننا کل انا ادبی زمواری ءِ انجینئر عائشہ زہری

قلات، ڈپٹی کمشنر قلات انجینئر عائشہ زہری تون براہوئی اکیڈمی نا اسہ ڈل اس بنجائی ایگزیکٹو ممبر نبی بخش انجم نا کماشی ٹی اوڑدہی کرے و ڈی سی انجینئر عائشہ زہری ءِ براہوئی اکیڈمی نا کنڈ آن شین تروک تاریخی کتاب و براہوئی کیلنڈر نا ٹیکی تس۔ ڈپٹی کمشنر قلات انجینئر عائشہ زہری دا وخت آ پارے کہ براہوئی زبان بلوچستان نا اسہ متکن آ زبان تیان اسہ اہم ءُ زبان اسے، ہرا نا شونداری و تالانی ننا ربیدگی و ادبی زمواری ءِ۔ براہوئی اکیڈمی نا کنڈ آن زبان و ادب نا شونداری، پٹ و پول و علمی و ادبی کتاب آتا شینک کننگ کن کروک کوشست آک ستا کڑزرہ۔ او پارے کہ براہوئی اکیڈمی براہوئی زبان و ادب نا شون اکن جتا جتا بشخ آتیٹی اہم خذمت سر تسنے، خاص وڑ اٹ براہوئی ادب نا بابت کتاب آتا شین تننگ، ادیب و شاعر آتا است بڈی و پوسکن آ نسل ءِ تینا لمئی زبان و ربیدگی تون گنڈنگ نا کوشست آک ستاکڑزرہ۔ انجینئر عائشہ زہری پارے کہ کتاب آک زبان اسے نا علمی و ادبی میرات ءِ رکھوک تخنگ نا کل آن گچین آ وڑ ءُ۔ براہوئی زبان اٹی گچین و پٹ وپولی کتاب آتا زیات آن زیات شینک مننگ آن نئے بیرہ زبان و ادب ءِ شون رسینگک بلکہ ننا بروک آ چین ہم تینا تاریخی، ربیدگی و ادبی میرات آن جوانی اٹ معلومدار مننگ کیک۔ او براہوئی اکیڈمی نا کارکڑد نا ستاءِ کرسا پارے کہ زبان و ادب نا شونداری کن سرکاری ادارہ، ادبی تنظیم، دانشور، ادیب و ورناتے مچ مرسا تینا کڑد ءِ ادا کروئی تمک۔ ضلعی انتظامیہ قلات براہوئی زبان و ادب نا شون و مثبت ادبی سرجز آتا است بڈی ءِ کیک۔ ڈپٹی کمشنر پارے کہ ننا زبانک ننا پجار و ربیدگی میرات نا اہم بشخ ءُ، دانا رکھ و شون ننا کل انا اسیجائی زمواری ءِ۔