(گُڈیکو بندغ              (افسانہ 

تیویٰ چاگڑد اٹی او اسٹ انگا بندغ ئس…. داڑے پین بندغ ذات انا ڈس و نشان الو…. بندغ ذات آن بیدس ایلو کل گڑاک ساہدارک، درخت آک، چک آک، ملخ و مور آک، بئے و بوچ آک، رنگ و بلسمک، دیر و دریاک، پر و جمرک، توبے و اِستارک، ریک و ملگزار آک، پھل وبلبل، خزم و گڈ آک، خل ومَش، گٹ وگَر آک، جل و ناوڑ آک، مُلک و کشارک، چیل و چُر آک، گ´وزوک آ ویل آک ساڑی ئسُر…. الو تو بندغ نا ذات اَلو…. بندغ آتا جوڑ کروک آ شار وخلق آک، بھلا بھلا مارکیٹ وشاپنگ مال و سینما ہال آک…. پارک وگوازی تا گراﺅنڈ آک بڑی بانگ ئسُر…. یورپ، امریکہ، جاپان، چین، جرمنی و ایلو ترقی یافتہ مُلک آتا جوڑ کروک آ زیبا انگا سڑک و ریلوے ٹیسن آک ویران ئسُر…. گاوانی آ ساہدارک داسہ بیدس ہڑز و خلیس آن شار تا سڑک آتیا پیری خلنگ ئسر….

چُک آتا چڑچڑ تینا کہول انا گل و بالی نا پڑو ءِ کننگ ئس….

چاگڑد ہروڑ انا دنز و لوڑ موڷ و ڈوگار، خازگ و کچٹی، شور زمبیر، گاڈی وجہاز تا غاروغیر آتیان پاک و سفا ئس…. ہچ ءُ جاگہ اس کوش و خون، جنگ و جدل الو…. ہر پارہ غا چپی ئس۔ توار اس بسکہ تو او جنگلی آ ساہدار چُک و جوجک آتا توار ئس….

اودے پک یخین ئس کہ تیویٰ جہان اٹی اسٹ انگا بندغ او بچانے…. ایلو غٹ خلقت ءِ کورونا پنی آ مرض کسفینے…. او سوچنگ ئس کہ بندغ ءِ دیر دا ڈول ہستی نا جہان آن نیست کرے۔ پدا داسوج اس ہم ئس کہ او امر بچّا ولے اودے خبر ئس کہ اودے بچوئی ئس و ایلو خلقت ءِ کورونا آخا بندغ نا جند انا ضد و اَنائیت، جوفہ و ہڑس دنیا غان ختم کرے….

بندغ تینا عقل و پامداری، طاقت و جوزہ غا اخس مغوز ئس اخس بُلنگاکہ…. و بندغ تینا طاقت ءِ توننگ و اقتدار و شہرت نا جوفہ ٹی تمسا داڑے انت انت کتو ….؟

اخہ در تباہی نا سامان داڑے جوڑ مَسر اوفتے کل ءِ بندغ نا جند جوڑ کرے۔ ایٹم بمب پین خاخری ءُ سلہہ، میزائل، توفک، جنگی جہاز وکیمیائی گیس و بلابتر ہرافک نئے بیرہ بندغ نا جند ءِ بھس کریر بلکن دا غٹ چاگڑد نا تباہی و بربادی نا سوب مسر….

کل آن زیات داکہ بندغ نیچر تون خوامخوا بیدس ضرورت آن چھیڑ چھاڑ کرے…. ہرا ساہدار تے کنوئی و کسفوئی الو ہموفتے کسفے ہموفتے کُنگ…. نیچر ءِ تینا بدلہ ءِ دے انا دے اس بندغ آن ہلوئی تو ئس…. دا نیچر نا بدلہ ئس بیر ئس ہراڑان خلقت چُٹا بندغ ختم مس….

اودے جوان یات بننگ ئس کہ سال اس مہالو دا وائرس امر غٹ خلقت ءِ پورو دنیا ءِ تینا پلویڑ اٹی ہلک…. دا وائرس آن بچوک آ اسٹ انگا بندغ چین انا ہندا سائنٹسٹ ئس ….

کہ اوہم “کورونا” پنی آ دین والا ناجوڑی ناگواچی مسوسس…. ہرادے تیٹ کورونا پنی آوائرس تیویٰ دنیاءِ ترند آ زمی جمب آنبارسُرفے تخا…. 9/11 آن پد، دا صدی نا دا کل آن بھلا جہانی واقعہ ئس، ہرا مچ آ دنیانا زرگزرانی، سیاسی، ربیدگی، نفسیاتی معاملہ غاتے بُھس کرے تخا۔ پورا دنیا بند مس بھلا مارکیٹ آک، ائیرپورٹ آک، بندرگاک بند، تیل انا بھلا منڈی کریش کرے تیل تینا تاریخ نا ریکارڈ شیف انگا نرخ آ بس…. بھلا اسٹاک ایکسچینج آک کریش کریر….

دا وائرس نا سوب آن بنائی اِرا تُو اٹی پورو دنیا ٹی کروڑ آ بندغ آک ناجوڑی نا گواچی مرسا کسکوسُر…. چائنا، جاپان، امریکہ، یورپ، کینڈا، سعودی، ایران، اٹلی، پاکستان ، ہندوستان نا سرحد آک بند کننگار۔

دنیا نا معیشت تباہ مس …. کاروبار آک یکدم ٹَپ سلیسُر….

مذہبی رسم وعبادت آتیا پابندی لگّا…. بت کداک ویران مسر…. خانہِ کعبہ ٹی ہم عبادت کننگ آ پابندی لگا۔ عمرہ ءِ بند کننگا۔ گڈیکو جمعہ نماز آ بیت اللہ ٹی بیرہ منہ بندغ خننگارہ….

موذن آک مسیت آتیان بانگ وخت آ بانگ اٹ پاریرہ کہ نمازکن مسیت آ بفبو….

بالی آ کسرک ہم بند کننگار، شارک ویران مَسُر، اسکول کالج، ہاسٹل تعلیمی ادارہ غاک انت کہ دفتر آک بند مسر، بیرہ ہسپتال آک ملوک ئسُر….

یہودی تا دیوار گریہ مغوز آ بندغ آتا دا بیوسی آ ہوغنگ ئس….

کربلا نا ویرانگی مودہ کشنگ ئس…. ویٹی کن سٹی نا کلیسا تیٹ سوگ اس تالان ئس….

بیت المقدس ہم بند کننگاسس…. برام تیا ہم پابندی لگا…. برام انت کہ جنازہ غاتیا پابندی ئس، سینما، پارک غٹ سیل و سوات نا ہند آک بند کننگار….

گوازی تیا پابندی لگا….

تینے نفسیاتی سیبو تننگ کن مخلوق کورونا نا درمان کن وڑ وڑ انا ہیت مون آ اتسا سوشل میڈیا ٹی بندغ آتے بتر گنوک کرے…. کس پاریکہ پیماز بھاز کنبو…. کس پاریکہ یکا وضو ٹی مبو….

کس پاریکہ تھوم کنبو…. کس پاریکہ اسٹ ایلو نا دُوءِ ہلپبو….

بخال آتا پنڈت آک پاریرہ کہ خراس نا چرو ٹی مون سلبو….

ایلو پارہ غان کورونا وائرس بھاز آ عقیدت آتا جنازہ ءِ کوپہ غاتیا ہرفے….

شراب ءِ حرام پاروک آک الکوہل نا کمک ءِ ہلنگ ئسُر….

ارتقائے حیات و بگ بینگ تھیوری نا بنیات آ سائنس ءِ تماشہ اس پاروک آک ڈاکسر، سائنٹسٹ ولیبارٹری تیا ہُننگ ئسُر کہ زو اس کورونا نا ویکسین و درمان جوڑ مرے تانکہ بچوک آ کروڑ آ بندغ آتا جان دا موذی آ مرض آن بچے…. ہرا مہالو نا دین تا وڑ یکدم کل دنیاءِ کیرغ ہڑسنگ ئس، دُن کہ مُست طاعون ہندا وڑ ءُ تباہی کریسس…. ہرادے تاریخ اٹی بلیک ڈیتھ نا پن اٹی یات کننگک اوٹی کروڑ آ بندغ آک کسکوسُر….

داسائنٹسٹ ءِ ہم ہموتم کورونا نا وائرس لگّا ہراوخت او ہندا مرض کن ویکسین نا نیت اٹی گڑاس ناجوڑ آن دتر نا نمونہ ہلسا دافتیا لیبارٹری ٹی کاریم کننگ ئس….

دامرض ہرکس ءِ لگوسس اسیکا اودے نزلہ، جکہ وزکام مسکہ او دا وخت آ اودے بھلو اڷ اس کریکہ پدا اڷ تے ہچ کشکتوکہ…. دا بیماری اسہ بندغ آن ایلوڑکن زو اس دمہ نا کمک اٹی سفر کریکہ….

گڑا دا سائنٹسٹ ءِ ہم کورونا نا مریض تا وڑ جتاءُ جاگہ سے ٹی بندی کننگا….

ولے او پارے ای کہنگ اسکان دانا ویکسین آ کاریم کروٹ گڑا اودے ہموڑے ضرورت نا گڑا تننگا کہ نی کاریم کر دانا ویکسین بلکہ جوڑ مرے دے پہ دے آن دامرض تیویٰ دنیاءِ پلویڑ اٹی ہلنگ ئس….

دا ڈاکٹر ءِ ٹی وی آن حوال رسینگ ئس کہ چین انا بھلا آبادی تون اوار مچ دنیا نا آبادی چُٹنگ ءِ…. قیامت ئس پین انت اس ئس کہ بندغ آک غٹ بیوس مسوسر…. ہرکس نا کہ بندغ دا کورونا وائرس نا گواچی مسکہ اونا ایلو بندغ آک اونا سیالداری ءِ الارہ اسُل کہ کس انا لمہ باوہ مروسُر…. غریب و مسٹمی دنیا نا ملک آک بھاز ترندی اٹ دا مرض نا پلویڑ اٹی برسا السی آ آبادی ءِ کم کننگ ئسُر…. کس اس دا مرض آن بچنگ الو زند انا ہر شعبہ انا بندغ آک دانا گواچی مرسا کہنگ ئسُر…. ولے دا وخت آ ہم بندغ نا ہوس و جوفہ دنیا غان کشکنگ الو….

دا دین انا دے تیٹ ہم مخلوق بے ایمانی، دروغ گوئی، منافقت، رشوت خوری، زناکاری، دُزی داڑیلی کشت و خون ءِ اِلنگ اَلو…. بھاز آک تو دادے مسخرہ اس سمجھارہ کہ دا بیرہ میڈیا نا تالان کروک ءُ حوال اسے دا غٹ دنیاٹی تالان متنے…. بھاز آک دا پاریرہ کہ دا وائرس بائیولوجیکل وار اسے دُن کہ امریکہ نا صدر پارے کہ دادے چین جوڑ کرینے ننا تباہی کن…. اصل ہیت ہندا سائنسٹ ءِ خبر ئس ہراداسہ تَک وتنیا دا جہان اٹی بچوک آ اسٹ انگا بندغ ئس…. او دا مخلوق نا ظلم وزوراکی، قتل و غارت گِری، بے انصافی تیان بدظن مرسا او تینا لیبارٹری ٹی تولوک اسہ دے فیصلہ اس کرے کہ ہندن ءُ وائرس اس ای جوڑ کیو ہرا غٹ بندغ آتے ختم کے…. گڑا او ہندا وائرس ءِ جوڑ کننگ تون اوار دانا درمان ءِ ہم جوڑکرے ولے درمان تے بیرہ اوڑتون ئس ہرادے او پین کس ءِ تتو جند تے ہم ایلوفتے نشان تننگ نا خاطر تینے ہندا مرض نا گواچی کرے ولے ہراتم اوخنا کہ او تینا کروک آ کڑد اٹی سرسہب مننگ ءِ، ہراعمل اٹی او پورو جہان نا بندغ آتے دا وائرس آن کسفنگ ءِ اودے سما ئس کہ اونا جوڑ کروک آ وائرس سال کپ اسے ٹی پورا دنیا نا بندغ آتے چُٹفک بیرہ ساہدارک بچرہ یاہمو بچک ہراڑتون داوائرس نا درمان ارے….

گڑا او اندری تینا شار آن پیشن سرہلک تینا درمان، توشہ وساز و سامان تون ہنداجنگل آبس ہراٹی اوداسہ تَک وتنیا انگا اسٹ انگا بندغ ذات ئس…. دا کائنات نا گڈیکو بندغ….

ہفتئی تلار

P#8

02-08 May 2020