ایس ایم ایز آتے سوگوکننگ حکومت نا اہم اولیت آتیٹی اوار ءِ،بنجائی واپار وزیر

بنجائی وزیر واپار جام کمال خان تون گوجرانوالہ سمال چیمبر آف کامرس نا ڈل اس اوڑدہی کرے، ہراٹی پاکستان نا چنکا و نیامی درجہ نا کاروباری ادارہ غاتا (ایس ایم ایز)، برآمد آتے مون آ دننگ، صنعتی گوبر‘ فنانس اسکان رسینگ و ریگولیٹری چیلنج آتیا گپ و تران کننگا۔ وزارت واپار نا ترجمان نا رداٹ بنجائی وزیر واپار جام کمال خان پارے کہ ایس ایم ایز پاکستان نا مینوفیکچرنگ سیکٹر اٹ مخ انا حیثیت تخک و روزگار نا وارخواہی ودی کننگ، صنعتی شونداری و برآمد آتے ٹی ودکی کننگ اٹ اہم کڑد ادا کیک۔ ایس ایم ایز آتے سوگوکننگ حکومت نا اہم اولیت آتیٹی اوار ءِ۔ ڈل افریقی منڈی تیٹی بزنس ٹو بزنس میٹنگ و واپاری ڈل آتا اڈتننگ کن حکومتی کمک نا خواست ہم کرے تانکہ پاکستانی کاروباری ادارہ غاتے واپاری رابطہ غاتے جوڑ کننگ اٹ کمک رسینگے۔ وزیر واپار پارے کہ افریقہ نا ودوک آ آبادی و گوبر نہاد والا گڑاتا خواست پاکستان نا انجینئرنگ، دھات، اُرائی ازباب و لائٹ مینوفیکچرنگ نا بشخ آتے کن اہم وارخواہی فراوان کیک۔ دیوان اٹ کاروبار کننگ نا زیات خڑچ، توانائی نا نہاد، خراج، اڑزان مالیات اسکان رسینگ و متکن صنعتی مشینری ءِ بدل کننگ نا بابت ہم گچین گپ و تران کننگا۔ جام کمال پارے کہ حکومت صنعتی گوبر ءِ گچین کننگ، ٹیکنالوجی نا اپ گریڈیشن ءِ مون آ دننگ و فنانسنگ اسکان گچین رسینگ نا کمک اٹ پوسکنوڑ نا است بڈی کن اصلاحات آتیا سرگرمی اٹ کاریم کننگ اٹی ءِ۔ ایکسپورٹ امپورٹ بینک آف پاکستان نا حوالہ ءِ ترسا وزیر ڈل ءِ پارے کہ حکومت برآمد کروک آتے آسراتی تننگ کن ایکسپورٹ فنانسنگ و کریڈٹ گارنٹی نا آسراتی تیٹی ترندی اتنگ اٹی ءِ۔ او کاروباری ادارہ غاتا است بڈی ءِ کرے کہ او ایکسپورٹ امپورٹ بینک آف پاکستان نا مخ تف فنانسنگ کن کمرشل بینک آتتون رابطہ کیر و اوفتے باور کرفے کہ وزارت دا آسودہی تسکان رسینگ اٹ برآمد کروک آتے مون تروک حقی ویل آتے ایسر کیک۔