اسہ ملین ”یوتھ ڈیولپمنٹ ایڈووکیٹس“ تیار کننگ نا قومی پروگرام نا پڑو ،پروفیسر احسن اقبال

بنجائی وزیر ڈٹ بندی، شونداری و خصوصی گام گیج پروفیسر احسن اقبال اسہ ملین ”یوتھ ڈیولپمنٹ ایڈووکیٹس“ تیار کننگ نا قومی پروگرام نا پڑو ءِ کرسا پارینے کہ پاکستان ءِ مون تروک کل آن بھلا چیلنج پوسکن آ پالیسی جوڑ کننگ اف بلکن قومی پالیسی تیا سیاسی بدلی تیان ایڑتر پدریسہ گچین عملدرآمد ءِ پک جوڑ کننگ ءِ۔ اقوام متحدہ نا شونداری پروگرام (یو این ڈی پی) پاکستان و وزارت ڈٹ بندی، شونداری و خصوصی گام گیج نا کمک اٹ اڈ ہلوک ”اسٹریٹجک ڈائیلاگ و ڈیولپمنٹ ایڈووکیٹ پاکستان رپورٹ” نا دود آن تران کرسا بنجائی وزیر پارے کہ دا قومی پروگرام نا رداٹ مچ آ ملک انا ورناتے علم، سرکڑدہی لائخی، گچین ابلاغ و کمیونٹی انگیجمنٹ نا ہیلکاری فراوان کننگک تانکہ او تینا تینا برادری تیٹی تعلیم، جان جوڑی، سفائی، چاگڑدی رکھ، آبادی نا بابت آگاہی و راجی شونداری نا مون آ دننگ اٹ فعال کڑد ادا کننگ کیر۔ احسن اقبال پارے کہ دُنیا نا ہمو ملک آک شون ہلکر، او تینا قومی اولیت و شونداری نا سج پام تیا 10 آن 15 سال اسکان مستقل مزاجی اٹ عمل کریر۔ او زور شاغا کہ پاکستان نا شونداری ہم ہمو وخت آ مننگ کیک ہراتم قومی پالیسی تے سیاسی بدلی تیان بچفسا پدریسہ نافذ کننگے۔بنجائی وزیر پارے کہ پاکستان دا وخت ترندی اٹ ودوک آ آبادی، کم خواندگی، لکھ آ چناتا اسکول آتیان پیشن، کنشت نا کمتی، ہیپاٹائٹس سی، موسمیاتی بدلی و ایلو راجی چیلنج آتتون مون تننگ ءِ۔ او پارے کہ دا ویل آتا ایسر بیرہ بنداوی پنجر نا جوڑ کننگ اٹ اف بلکن انسانی شونداری، راجی شعور و زموار شاری رویہ غاتا مون آ دننگ اٹی ءِ۔او پارے کہ ”اڑان پاکستان” دا چیلنج آتتون مون تننگ کن اسہ جامع قومی اصلاحاتی فریم ورک اسے، ہرانا رداٹ تعلیم، جان جوڑی، آبادی نا گچین بست وبند‘ زالبول و ورناتے واکدارجوڑ کننگ، پوسکن آٹیکنالوجی، موسمیاتی لچک و انسانی وسیلہ غاتا شونداری ءِ قومی اولیت تننگ انگ ءِ۔احسن اقبال پارے کہ حکومت قومی آبادی کونسل نا کمک اٹ آبادی نا گچین انتظام ءِ مونی دننگ انگ ءِ، وخت اس کہ اسلام آباد، گلگت بلتستان و آزاد جموں و کشمیر ءِ ہیپاٹائٹس سی آن پاک کننگ نا مہم ہم برجاءِ۔ او پارے کہ راجی بشخ آتیٹی گچینی کن صوبہ غاتا کمک ءِ پین سوگو کننگ انگ ءِ و اسہ ملین یوتھ ڈیولپمنٹ ایڈووکیٹس نا کمک اٹ مچ آ ملک اٹ کمیونٹی کہول آ مثبت راجی بدلی نا سرکڑدہ ئی ءِ ءِ مونی دننگک۔بنجائی وزیر پالیسی جوڑ کروک، یونیورسٹی، ذرائع ابلاغ، شونداری نا شریدار و سول سوسائٹی آ زور شاغا کہ او پاکستان نا مدامگی‘ جامع و مریس مدی شونداری نا اسیجائی قومی ایجنڈا غا یکجا مرسا تینا کڑد ءِ ادا کیر۔ او پارے کہ اینو اسل امتحان پوسکن آ پالیسی جوڑ کننگ نا اف بلکن اوفتیا آخبتی و گچین عملدرآمد نا ءِ۔ سرسہبی نا راز بیرہ اسٹ ءِ’پالیسی آ عملدرآمد‘۔