چین و پاکستان نا ایران ءِ سلہہ فراوان کننگ نا ہیت آک راست افس، امریکی صدر ڈونلڈ ٹرمپ

امریکی صدر ڈونلڈ ٹرمپ ایران ءِ چینی جوڑ کروک فضا نا رکھی سلہہ غاتا گمانی فراوانی نا بابت چین و پاکستان تون گنڈوک سوج آتے مسترد کرسا پارینے کہ چینی صدر شی جن پنگ اودے باور کرفینے کہ چین ایران ءِ سلہہ فراوان کپک۔ ایلو کنڈ آ چین دا دوبہ غاتے بے بنداو گوندانے‘ وخت اس کہ پاکستان مہالو آن ہر وڑانا گمانی رسینگ گیگ کاریم اٹ تینا کڑدار ءِ مسترد کرینے۔ میڈیا حوال آتا رِد اٹ امریکی صدر ڈونلڈ ٹرمپ اسہ صحافی اسے نا ہمو سوج ءِ مسترد کرے ہراٹی ایران ءِ گمانی وڑ اٹ چینی سلہہ نا فراوانی نا باندات آ چین و پاکستان ءِ اوار کننگ نا کوشست کننگاسس۔ دا سوج ہمو وخت اس مون آ بس ہراتم بھاز آ میڈیا حوال آتیٹی دعویٰ کننگاسس کہ ایران ءِ چین نا جوڑ کروک آ QW-12 و FN-16 کوپہ غا تخسا فائر کروک آ فضا نا رکھی میزائل نظام نا 400 اسکان لانچرز نا کھیپ رسینگانے‘ حوال آتا رِد اٹ ٹرمپ پارے کہ چینی صدر شی جن پنگ اودے جندی وڑ اٹ باور کرفینے کہ چین ایران ءِ سلہہ فراوان کپک۔ ایلو کنڈ آ چین ہم دا حوال آتے پورو وڑ اٹ بے بنداو گوندانے۔ پاکستان مہالو آن دا ہیت آتے مسترد کرینے کہ اونا ڈغار چین آن ایران اسکان ہچ ءُ سلہہ اسے نا سر کننگ کن کاریم اٹ بفننگ اٹی ءِ‘ او پیدوار کرے کہ دا بابت تالان مروک غوغاک بے بنداو ءُ۔ میڈیا حوال آتیٹی دا ہم پاننگانے کہ چین، پاکستان و ترکیہ ءِ ایران ءِ سلہہ فراوان کننگ تون اوار کننگ ناد عویٰ تے بھاز آ بھارت و اسرائیل نواز معلومداری نیٹ ورک آتا کنڈ آن وار وارتالان کننگ انگ ءِ۔ ہرافتا مسخت ڈیہہ اٹ برجا سفارتی کوشست آتے زہمی کننگ و دروغ نا حوال آتا کمک اٹ شکبری تالان کننگ ءِ۔ پاکستان اسہ وار ولدا تینا دا موقف نا دوارگی ءِ کرینے کہ او ڈیہہ اٹ چک وتاڑ نا چٹفنگ‘ مذاکرات نا شون و جھیڑہ غاتا پرامن ایسری نا مخ تفی ءِ کیک و اسہ کنڈہپروک خیرخواہ سے نا وڑ اٹ سفارتی کوشست آتے برجا تخانے۔