امن ایمنی نا پک کننگ کن،سندھ و بلوچستان نا سیمی سیکورٹی نا بابت حب اٹی اہم دیوان

سندھ و بلوچستان نا بین الصوبائی سیم انا سیکورٹی نا بابت حب اٹی اہم ءُ دیوان اس اڈ ہلک۔ دیوان اٹی ہڑتوم آ صوبہ غاتا معلومداری نا ہل وتس و ڈوہدار آتا برخلاف درکار‘ عدالت آن نروک، سزا کنوک‘ اشتہاری و ایلو ڈوہ تا زموار ڈوہدارتا ہل وتس اوفتا برخلاف وخت آ کارروائی و اسہ صوبہ غان ایلو صوبہ غا ہن و بر نا توننگ المی ءِ۔ کل وڑ انا دُزی کروک گاڈی و موٹر سائیکل آتا بابت اسہ صوبہ غان ایلو صوبہ غا توننگ کن سیف سٹی نظام نا کمک اٹ اسٹ ایلو ءِ معلومداری تننگک۔ وخت اس کہ دہشت گردی نا چٹفنگ کن محکمہ دہشت گردی تور (سی ٹی ڈی) نا چاروکی ٹی اسیجائی انٹیلی جنس بیسڈ آپریشن کننگک۔ موبائل سم آتا جانچ و خاص وڑ اٹ کانود آن چَپ ہندی اوغان باتی تا ہن و بر نا توننگ کن سیمی علاقہ غاتیٹی اسیجائی کارروائی ہم کننگک۔ دیوان اٹی دا ہیت آ ہم امنا کننگا کہ بین الصوبائی سیم آ ہر وڑ انا کانود آن چَپ گاڈی، موٹر سائیکل و بندغ آتا ہن و بر نا وخت آ سلہہ، منشیات، ایرانی تیل و ایلو ممنوعہ گڑاتا اسمگلنگ نا توننگ کن کریک ڈاؤن ءِ پین بھرمی جوڑ کننگک و دانازموار آتا برخلاف بے فرق آن کارروائیک برجا تخنگرہ۔ ہڑتوم آ صوبہ غاتا سیم آ گاڈی و مخلوق نا ہن و بر نا وخت آ ہر وڑ انا ممنوعہ گڑا خاص وڑ اٹ سلہہ، منشیات و ایرانی تیل انا اسمگلنگ کروک آتا حوصلہ شکنی و دانا زموار بندغ آتا برخلاف کریک ڈاؤن برجا تخنگک۔ دیوان اٹی دا ہم پک مس کہ سندھ پولیس و بلوچستان پولیس ءِ تکنیکی کمک، جیو فینسنگ، آئی ٹی و ایلو بشخ آتیٹی بلوچستان پولیس نا کارندہ غاتے ہیلکاری تننگ نا آسراتی فراوان کیک۔ داڑان بیدس ہڑتوم آ صوبہ غاتا پولیس آتا نیام اٹی کراچی پولیس و حب پولیس نا مواصلاتی نظام ءِ پین جوان و بھرمی کننگک۔ دیوان اٹی دا گڑاغا ہم امنا مس کہ سہ ماہی دیوان نا بروک آ ریسہ سندھ اٹی اڈ ہلیک۔ سندھ و بلوچستان نا سیمی علاقہ غاتیٹی پوسکن آ چیک پوسٹ تا جوڑ کننگ نا بابت دیوان اٹی اہم فیصلہ کننگا۔ دیوان اٹی امنائی فیصلہ مس کہ سندھ پولیس، بلوچستان پولیس ءِ تکنیکی کمک، جیو فینسنگ، آئی ٹی و ایلو پوسکنوڑ بشخ آتیٹی ہیلکاری فراوان کیک وخت اس کہ کراچی و حب پولیس نا نیام اٹی مواصلاتی نظام ءِ پین بھرمی و گچین کننگ آ ہم امنا کننگا۔ دیوان اٹی دا ہم پک مس کہ ہڑتوم آ صوبہ غاتا نیام اٹی سہ ماہی دیوان تا ردوریسہ ءِ برجا تخنگک‘ ہرانا بروک آ دیوان سندھ اٹی اڈ ہلیک۔