حکومت بلوچستان نا پولیس شہید آتا معاوضہ غاتیٹی ودکی نا فیصلہ
وزیراعلیٰ میر سرفراز بگٹی منظوری کن سمری بٹنگا، شہداء نا پدخاہوت کن نقد معاوضہ اسہ کروڑ بیست و پنچ لکھ روپئی کننگ نا سلاہ
Get real time updates directly on you device, subscribe now.
حکومت بلوچستان پولیس شہید آتا معاوضہ غاتیٹی و پلاٹ یا ڈغار نا بدل اٹی نقد ادائیگی نا پک کروک آ کچ اٹی ودکی نا فیصلہ کرینے، وزیراعلیٰ بلوچستان منظوری کن سمری بٹنگا،۔ وزیراعلیٰ بلوچستان نا مشیر برائے حوالکاری و سیاسی باندات شاہد رند پارینے کہ وزیراعلیٰ بلوچستان میر سرفراز بگٹی نا پارت آ پولیس شہداء نا خلق خاہوت کن مالی کمک نا پیکیج ءِ پین جوانی نا کنڈ آ دننگ کن ساڑی آ کچ آتیا جاچ ہلنگ نا فیصلہ کننگانے و دا ردوم اٹی متعلقہ محکمہ غاتیان منظوری کن سمری بٹنگانو۔ شاہد رند نا رِد اٹ سلاہ ئی جاچ نا رِد اٹ بی-1 آن بی-16 اسکان نا پولیس شہداء، ہرافتیٹی کانسٹیبل، ہیڈ کانسٹیبل، اے ایس آئی، سب انسپکٹر و انسپکٹر اوار ءُ، اوفتا پدخاہوت کن نقد معاوضہ اسہ کروڑ روپئی آن ودفسا اسہ کروڑ بیست و پنچ لکھ روپئی کننگ نا سلاہ تننگانے۔ ہنداوڑ بی-1 آن بی-8 اسکان نا کانسٹیبل و ہیڈ کانسٹیبل آتے کن پلاٹ یا ڈغار نا بدل اٹی نقد ادائیگی نا کچ ءِ 11 لکھ روپئی آن ودفسا 25 لکھ روپئی کننگ نا سلاہ ہم سمری ٹی شاغنگ انگ اٹی ءِ