وزیراعلیٰ بلوچستان میر سرفراز بگٹی و میر سلیم خان کھوسہ نا اوڑدہی، نصیر آباد اٹی دیر نا کاختی آ شرہ

وزیراعلیٰ بلوچستان میر سرفراز بگٹی آن پاکستان مسلم لیگ (ن) نا بلوچستان اسمبلی اٹی پارلیمانی لیڈر میر سلیم خان کھوسہ اوڑدہی کرے ہراٹی نصیر آباد ڈویژن اٹی کشاری نا حالیت آتیا خوڑتی اٹ تبادلہ خیال کننگا۔ میر سلیم خان کھوسہ وزیراعلیٰ بلوچستان ءِ نصیر آباد ڈویژن نا ناڑی تیٹی دیر نا بھاز انگا کاختی و داڑآن کشاری و کشارگر آتے پیش بروک آ خواری تیان آگاہ کرے۔ وزیراعلیٰ بلوچستان نا مشیر برائے حوالکاری و سیاسی باندات شاہد رند نا رِد اٹ وزیراعلیٰ بلوچستان میر سرفراز بگٹی دا ردوم اٹی دمدستی وڑاٹ وزیراعلیٰ سندھ سید مراد علی شاہ تون فون آ رابطہ کرے ہرا نا وخت آ ہڑتوم آ وزیراعلیٰ غاتا نیام اٹی دیر نا حالیت و بین الصوبائی آبی باندات آتیا خوڑتی اٹ تبادلہ خیال مس۔ ہڑتوم آ وزیراعلیٰ غاک بلوچستان و سندھ نا نیام اٹی دیر نا ویل آتا ایسری، دیر نا منصفانہ بشخ و پانٹ و ساڑی آ حالیت آتیٹی جوانی کن باہمی کمک و اسیجائی گام گیج آتیا امنا کریر۔ شاہد رند نا رِد اٹ ہڑتوم آ وزیراعلیٰ غاک تینا تینا صوبہ غاتا وزرائے آبپاشی ءِ دمدستی وڑاٹ سکھر سر مننگ نا پارت جاری کرینو تانکہ متعلقہ کمامدار آتون اوار دیوان اڈ ترسا دیر نا حالیت نا جاچ ءِ ہلنگ مرے و قابلِ عمل ایسری آ پیش رفت ءِ پک کننگے۔