بلوچستان ویمن انٹرپرینیورشپ ڈیولپمنٹ پروگرام مزل نا نشان اسے،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی بلوچستان ویمن انٹرپرینیورشپ ڈیولپمنٹ پروگرام نا اولیکو ریسہ نا سرسہب پوروی آ خوشی نا درشانی ءِ کرسا پروگرام پورو کروک آ 500 نیاڑی ءِ مبارکبادی تسنے۔ راجی رابطہ نا ویب سائٹ ایکس آ تینا اسہ کلہو اسے ٹی وزیراعلیٰ میر سرفراز بگٹی پارے کہ نیاڑی تے زرگزرانی وڑاٹ واکدار جوڑ کننگ حکومت بلوچستان نا اولیکو اولیت آتیٹی اوار ءِ و ہندا وژن نا رِد اٹ نیاڑی تے پوسکنوڑ واپاری کسب، ڈیجیٹل ٹیکنالوجی و جندی روزگار نا وارخواہی تا فراوانی کن عملی گام گیج کننگ انگ ءِ‘ او پارے کہ بلوچستان ویمن انٹرپرینیورشپ ڈیولپمنٹ پروگرام صوبہ ٹی نیاڑی تا زرگزرانی شونداری نا کنڈ آ اسہ اہم ءُ مزل نا نشان اسے، ہرانا کمک اٹ جتا جتا ضلع غاتیان تعلقدار نیاڑی تے پوسکنوڑ کاروباری چاہنداری‘ مارکیٹنگ، کاروباری ڈٹ بندی و ڈیجیٹل ازباب آتا کاریم اٹ اتنگ نا ہیلکاری فراوان کننگانے۔ او پارے کہ دا وڑ انا ہیلکاری نیاڑی تے نئے بیرہ جندی وڑ اٹ تینا نت تیا سلفنگ اٹ کمکار مریک بلکن او صوبہ و ملک انا زرگزران اٹی ہم کڑد ادا کننگ کیرہ۔ وزیراعلیٰ پارے کہ نیاڑی تا لائخی تیا حکومت ءِ پورو پت ءِ‘ و اوفتے مستی ہننگ کن جوان ءُ چاگڑد و جوان وارخواہی فراوان کننگک۔ او دا عزم انا درشانی ءِ کرے کہ حکومت بلوچستان نیاڑی تے کن ہنرمندی، کاروباری شونداری و روزگار نا پین وارخواہی ودی کننگ کن دا وڑ انا پروگرام آتا دنگ ءِ پین ودفک تانکہ زیات آن زیات نیاڑی دافتیان فائدہ ہرفنگ کیر۔ میر سرفراز بگٹی سلاہکار محکمہ زالبول شونداری ڈاکٹر ربابہ خان بلیدی، محکمہ زالبول شونداری و پروگرام نا اڈ تننگ اٹی اوار کل تعلقدر ادارہ و ٹیم ءِ دا سرسہب گام آ مبارکبادی ترسا پارے کہ نیاڑی تے واکدار جوڑ کننگ کن اوفتا کوشست آک ستا کڑزرہ۔ او اومیت درشان کرے کہ دا وڑ انا گام گیج آک بلوچستان اٹی نیاڑی تا زرگزرانی وتواجہی‘ مختاری، کاروباری شونداری و مدامگی آسودہی نا شونداری ٹی اہم ءُ کڑد اس ادا کیرہ۔