کاروبار اٹ آسانی کن جوانی اتنگ نا باندات آتیٹی تیزی اتنگے، وزیراعظم محمد شہباز شریف

وزیراعظم محمد شہباز شریف نا کماشی ٹی کاروبار اٹی آسانی نا گام گیج آتا جاچ ہلنگ کن اہم ءُ دیوان اس اڈ ہلک، ہراٹی حکومت نا کنڈ آن کروک پالیسی گام گیج و آسان کاروبار ایکٹ 2025 انا نفاذ ءِ پین تیز کننگ نا پارت کننگا۔ وزیراعظم دیوان آن تران کرسا پارے کہ پاکستان اٹی ہندی و درملکی زرکاری نا بے کچ وارخواہی تیان پورو فائدہ ہرفنگ حکومت نا اولیکو اولیت ءِ‘ او پارت کرے کہ کاروبار اٹی آسانی نا گام گیج آتا بھرمی و اوفتا عملی نفاذ نا جاچ اکن جہانی ادارہ غاتیان تھرڈ پارٹی ویلیڈیشن ءِ ہم پک کننگے۔ شہباز شریف تعلقدار ادارہ غاتے پارت کرے کہ کاروبار اٹی آسانی کن کروک پالیسی گام گیج آتیا جامع رپورٹ زُوت آن زُوت تیار کرسا پیش کننگے۔ او وزارتِ کانود و انصاف، ایس آئی ایف سی، زرکاری بورڈ، وزارت واپاری‘ وزارت صنعت و ایلو تعلقدار ادارہ غاتا کوشست آتا ستاءِ کرسا اوفتے ستا کڑزوک گوندا۔ دیوان ءِ بریفنگ اٹی پاننگا کہ مچ آ ملک اٹی کاروبار اٹی آسانی کن جتا جتا کانود‘ ضابطہ، کاغذی کارروائی و منظوری تے کم کننگ نا بابت 558 اصلاحات آ کاریم پورو کننگانے۔ دافتیٹی 71 پالیسی گام گیج آتیا پورو عملدرآمد مسنے وخت اس کہ 272 اصلاحات نا نفاذ آ تیزی اٹ کاریم برجا ءِ۔ دا اصلاحات ہفت جتا جتا ریسہ غاتیٹی نافذ کننگ انگ ءِ‘ بریفنگ نا رِد اٹ دا اصلاحات نا سوب آن کاروباری برادری نا ضابطہ و شڑت آ بروک آ خڑچ اٹ 468.7 ارب روپئی اسکان نا بچت نا کساس خلنگانے۔ دیوان ءِ مستی پاننگا کہ بے گرج و ول ویچڑ آ کاغذی کارروائی تا چٹفنگ آن برآمد اٹی ودکی، دراست درملکی زرکاری ٹی جوانی و روزگار نا پوسکن آ وارخواہیک ودی مریرہ۔ وزیراعظم پارت کرے کہ تعلقدار ادارہ غاتا افسر آتا کارکڑد نا جاچ انا وخت آ کاروبار اٹی آسانی نا گام گیج آتیا عملدرآمد و اوفتا سوب آن ودی مروک روزگار نا وارخواہی تے بھاز اہمیت تننگک۔ دیوان اٹی بنجائی وزیر اعظم نذیر تارڑ، قیصر احمد شیخ، جام کمال خان، احد خان چیمہ، سید مصطفی کمال، وزیر مملکت بلال اظہر کیانی، سلاہکار وزیراعظم محمد علی، خصوصی کمکار ہارون اختر، اٹارنی جنرل منصور اعوان و ایلو بڑزکو کمامدار آک بشخ ہلکر، وخت اس کہ گورنر اسٹیٹ بینک جمیل احمد، گلگت بلتستان، آزاد کشمیر و ہر چار آ صوبہ غاتا چیف سیکرٹریک ویڈیو لنک انا کمک اٹ بشخ ہلکر۔