پاکستان اٹ زرکاری ڈٹ آتیا کاریم برجا ءِ، چینی سفیر

چینی سفیر جیانگ زیڈونگ پارینے کہ پاکستان اٹی جتا جتا شونداری و زرکاری ڈٹ آتیا تفوئی کاریم برجا ءِ ہرافتا پورو مننگ آن 20 ہزار آن زیات روزگار نا وارخواہی ودی مننگ نا گمان ءِ‘ ہرا ملک انا زرگزرانی سرجز آتیٹی اہم ءُ کڑد اس ادا کیرہ۔ پاک چین بی ٹو بی زرکاری کانفرنس آن تران کرسا او پارے کہ وزیراعظم شہباز شریف خاص وڑ اٹ جانجوڑی، فارماسیوٹیکل و بائیوٹیکنالوجی نا بشخ آتا شونداری آ خاص چکار کننگ اٹی ءِ‘ وخت اس کہ دا بشخ آتیٹی پاک چین کمک نئے بیرہ زرکاری بلکن پوسکنوڑ ٹیکنالوجی، پٹ وپول و کاریمی واکداری کچ اٹی ودکی نا سوب ہم مریک‘ او دا اومیت نا درشانی ءِ کرے کہ ہڑتوم آ ملک آتا پرائیویٹ بشخ آتا نیام اٹی ودوک آ کمک آخبت اٹی اسیجائی زرکاری، صنعتی شونداری و السی آسودہی نا پوسکن آ وارخواہی تے ودی کیک۔