لاہور ہائیکورٹ،عمران خان نا رکھی ضمانت نا درخواست خارج

اسلام آباد : اسلام آباد نا دہشتگری تور عدالت (اے ٹی سی) آن ضمانت نا مسترد مننگ آن پد لاہور ہائی کورٹ ہم پیش مفننگ ناسوب آن عمران خان نا رکھی ضمانت نا درخواست ءِ خارج کرے۔ لاہور ہائی کورٹ نااِرا باسکی بینچ رکھی ضمانت کیس انا سماعت نا وخت آ عمران خان نا پیش مرسا وضاحت تفننگ آ توہین عدلت نا نوٹس جاری کننگ نا اشارہ تسوسس۔ جسٹس طارق سلیم شیخ ریمارکس ترسا پارے کہ عمران خان ءِ عدالت اٹ برسا سوغند آ دستخط نا وضاحت ءِ کروئی مریک۔ عمران خان نا وکیل پارے کہ وخت تننگے۔ عمران خان آن ارفنگ خواوہ‘ جسٹس طارق سلیم شیخ سماعت ءِ شش ونیم بجہ اسکان ملتوی کریسس ولے عمران خان شش ومیم بجہ غا ہم عدالت اٹ پیش متو تو لاہور ہائیکورٹ نا ارا باسکی بینچ اونا رکھی ضمانت نا درخواست ءِ خارج کرے۔ اسلام آباد نا دہشتگری تور عدالت آن ضمانت نا مسترد مننگ آن پد عمران خان نا رکھی ضمانت نا درخواست نا سماعت لاہور ہائی کورٹ اٹ مس۔ عمران خان نا رکھی ضمانت کن عمران خان نا وکیل جسٹس طارق سلیم شیخ نا مون آ پیش مس۔ ایڈووکیٹ اظہر صدیق عمران خان ناکنڈآن تینا وکالت نامہ ءِ جمع کرفے۔ عمران خان نا وکیل پارے کہ ڈاکٹر آتتون ہیت کننگ انگ ءِ‘ سکیورٹی آ پارٹی نا گڑتیک اریر‘ کوشست کننگ انگ ءِ کہ اِرا گھنٹہ ٹی عمران خان وڑ اسے ٹی سر مرے۔ عمران خان نا وکیل نا درخواست آ عدالت اول اٹ دوانزدہ ونیم بجہ اسکان وقفہ کرے۔ عدالتی نا وارخواہی چٹا ولے عمران خان لاہور ہائی کورٹ اٹ پیش متو۔ رکھی ضمانت نا درخواست آ سماعت دوارہ بنا کرے تو کمکار وکیل عدالت ءِ پارے کہ ایڈووکیٹ اظہر صدیق پارت ہلسا بننگ اٹی ءِ۔ مچٹ وخت تننگے ہراکان گڈ عدالت سماعت اٹ ارٹمیکو وار وقفہ کرے و سماعت کن دو بجہ نا وخت ءِ پک کرے‘ دو بجہ غا عمران خان نا رکھی ضمانت کن درخواست آ سماعت بنا کرے تو عمران خان نا وکیل اظہر صدیق و درمان کروک ڈاکٹر فیصل سلطان عدالت اٹ پیش مس۔ وکیل اظہر صدیق پارے کہ ضمانت نا اسہ پین درخواست اس دائر مسنے‘ ڈاکٹر تون ہیت مسنے۔ عدالت ناپرمان آ عمل کننگ کن سنبرینگوک ان۔ ڈاکٹر طارق سلطان ہنداڑے ساڑی ءِ۔ جسٹس طارق سلیم پارے کہ ڈاکٹر ءِ بنوئی اف‘ شڑت دادے کہ عمران خان اول اٹ عدالت اٹ پیش مرے۔ عمران خان نا وکیل پارے کہ ضمانت نا ارٹمیکو درخواست کن ہننگے‘ عدالت پارے کہ اونا انتظار نا گرج اف‘ نی ساڑی درخواست آ دلیل تا بناءِ کر۔ عمران خان نا وکیل پارے کہ ای ضمانت نا ساڑی درخواست ءِ پدی ہلنگ خواوہ۔ داوخت آ سوغند و وکالت نامہ غا عمران خان نا اسہ وڑ انا دستخط مفننگ نا لاہور ہائی کورٹ نوٹس ءِ ہلک۔ عدالت عمران خان نا وکیل نا درخواست ءِ پدی ہلنگ نا خواست ءِ ہم رد کرے۔ یات سلے کہ تدوک آ دے انسداد دہشت گردی عدالت نا جج جواد عباس الیکشن کمیشن ناپیشن آ برانز نا بابت کیس اٹ عمران خان نا ساڑی مفننگ نا درخواست ءِ خارج کریسس۔ دہشت گردی تور عدالت عمران خان ءِ یک ونیم بجہ اسکان پیش مننگ نا وخت تسوسس ولے او پک کروک وخت آ عدالت اٹ پیش متو تو عدالت فیصلہ ءِ بنفسا اونا ضمانت نا درخواست ءِ خارج کرے۔

(مانیٹرنگ ڈیسک)