حکومت ورناتے پوسکنوڑ کسبکاری تیان شُپ کننگ اٹی ءِ،وزیر اعلیٰ بلوچستان میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان نا ورناتے تینا لائخی تے کاریم اٹ اتنگ نا پبی وارخواہی فراوان کننگ انگ اٹی ءِ۔ ورنا تتون شونداری و شونہالی نا کسر ءِ دوئی کننگ یا شرپسند آتا پراگندہ مسخت آتا بشخ مرسا عبرتناک مرک اتون مون تننگ نا اِرا آپشن ءُ۔ داسہ دا اوفتا ٹے کہ او ہرا کسر نا گچین کاری ءِ کیرہ۔ پریس کانفرنس آن تران کرسا او پارے کہ صوبائی حکومت ورناتے پوسکنوڑ کسبکاری تیان شُپ کننگ اٹی ءِ۔ ورناتیکن میرٹ و شفافیت نا بالادستی ءِ پک کننگ انگ اٹی ءِ۔ او پارے کہ حکومت زالبول آتا رکھ و اوفتا بڑزکو کہولی تعلیمی رسینگ گیگ کن ہم کوشست کننگ اٹی ءِ۔ زالبول آتا خوانندہ مننگ راج انا شونداری کن بھاز اہم ءِ۔ ورناتے کاروبار کن ہم کمک تننگ انگ اٹی ءِ، ہراٹی زالبول آتے ہم بریبری نا وارخواہی تننگانے۔ او پارے کہ یوتھ اکن فائدہ ئی ڈٹ آتا دنگ ءِ ودفنگک۔ کرپشن نا چٹفنگ و میرٹ آ تالان پالیسی دوئی کننگ اسکان نن ہچ گہس شون ہلنگ کپنہ۔ او پارے کہ الس ءِ سفری آسراتی تا تننگ کن نن گرین بس چلیفین، دا بس آتیا خلکاری کننگ یا بھس کننگ تینا جند انا شاری تتون دُشمنی ءِ۔ بلوچ ورناتے دا رد اٹ آگاہی تروئی تمک۔ حکومت اگہ ڈٹ اسے نا بنا ءِ کیک تو دا حکومتی وزیر یا بڑزکو کہولی کمامدار آتیکن مفک بلکہ اوفتا جند انا آسراتی کن مریک۔ او پارے کہ یوتھ انا ڈٹ آتیکن مسہ ارب روپئی جتا کننگانے اگہ اوفتا مثبت کاریم اٹ اتنگ ءِ پک کننگے تو نن دا فنڈز آتے ودفسا یانزدہ ارب اسکان سر کننگ کینہ۔ او پارے کہ صوبہ ٹی منشیات اسمگلنگ بھسکاری نا اسہ بھلو سوب اسے حکومت اسمگلنگ نا توننگ کن اہم گام گیج کرینے ہراڑان دا ناچوڑ نا مون ءِ توننگ اٹی بھلو کچ اس اسکان سرسہبی ملک۔ او ورناتے مخاطب کرسا پارے کہ اسہ کنڈ آن نم کن بھسکاری و بربادی نا کسر ءِ شرپسند آک ورناتے تینا پراگندہ مسخت آتیکن کاریم اٹ اتنگ اٹی ءُ اوفتے ریفسا ریاست نا برخلاف سلفسا خودکش جلہو کرفرہ، اوفتے مش تیا درسا اوفتا برین واشنگ کننگک، و ہراتم دا ورناک خودکش جلہو کیرہ یا سیکورٹی فورس آتا آپریشن اٹی خلنگرہ تو دا بندغ آک اوفتا لاش تے ہم اِلرہ نررہ۔ ایلو کنڈ آ حکومت ورناتا شونداری کن گچین ڈٹ آتا بنا ءِ کرسا اوفتے شونداری و شونہالی نا کنڈ آ دننگ کن کاریم کننگ اٹی ءِ داسہ دا نمے آ ٹے کہ نم ہرا کسر ءِ ہرفرے۔ او پارے کہ شرپسند آتا پد اٹ ہنوک آتا پد پراگندہ مرک آن بیدس پین ہچ مفرو۔