قومی استقامت اسیجائی زمواری نا المی بشخ اسے، آصف علی زرداری

اسلام آباد، صدرِ مملکت آصف علی زرداری پارینے کہ پاکستان ءِ موسمیاتی بدلی، چاگڑدی تنزلی و ترندی اٹ ودوک آ شاری آبادی نا سوب آن قدرتی آفت نا ودوک آ گڑتی تا مونی بننگ نا گمان ءِ۔ دا سوب آن آفت آتتون مون تننگ نا قومی واکداری ٹی ودکی مدامگی شونداری کن المی ءِ۔ او کل ادارہ، کمیونٹی و شاری تیا زور شاغا کہ او قومی استقامت ءِ اسیجائی زمواری سرپند مرسا قدرتی آفت آتتون مون تننگ کن تینا تیاری و لائخی تے پین گچین جوڑ کیر۔ قومی یومِ استقامت نا وخت آ تینا کلہو اٹی صدرِ مملکت 8 اکتوبر 2005ء نا بھسکاری تالان کروک زمی جمب اٹی زوال مروک آ بندغ آتے خراجِ تحسین پیش کرے و زمی جمب آن زہمی تتون یکجہتی نا درشانی ءِ کرے۔ او سختی نا دا ساہت اٹی زہمی تا کمک کروک آ کل بندغ آتے و ادارہ غاتے ہم سلام پیش کرے۔ صدر آصف علی زرداری قدرتی آفت آن پد پاکستان تون کمکاری و یکجہتی نا درشانی کروک آ جہانی برادری نا منت ءِ ہرفے۔