اسیجائی وزارتی کمیشن دیوان، پاکستان و بحرین نا واپار و زرکاری تون اوار چندی بشخ آتیٹی کمکاری ودفنگ آ امنا

اسلام آباد، پاکستان و بحرین واپاری، زرکاری، کشت و کشار، تعلیم، جانجوڑی، دود ربیدہ، میڈیا و میری ٹائم تون اوار چندی بشخ آتیٹی تین پہ تینی کمکاری ءِ ودفنگ و زرگزرانی تعلقداری تے پوسکن ءُ دروشم اس تننگ آ امنا کرینو۔ ہڑتوم آ ملک آک تین پہ تینی واپار ءِ دو کچ کننگ نا ارادگی نا درشانی ءِ کرسا ڈیہہ انا بدل مروک آ حالیت، سفارت کاری نا اہمیت و ڈیہہ ئی امن و سوگوی کن اسیجائی کوشست آتا گرج آ ہم زور شاغار۔ نائب وزیراعظم و وزیرِ خارجہ محمد اسحاق ڈار بحرین نا وزیرِ خارجہ ڈاکٹر عبداللطیف بن راشد الزیانی نا اواری اٹ اسیجائی پریس کانفرنس آن تران کرسا پارے کہ پاکستان و بحرین نا نیام اٹی ایلمی و خُڑکی تعلقداری ءُ، ہرافتے واپار و زرگزرانی شونداری نا پوسکن آ وارخواہی تا وسیلہ اٹ پین سوگو جوڑ کننگک۔ اسحاق ڈار پارے کہ او بحرینی ہم منصب تون اوار پاکستان بحرین اسیجائی وزارتی کمیشن نا دیوان نا اسیجائی کماشی ءِ کرے، ہرا بھاز جوان ءُ چاگڑد اسے ٹی اڈ ہلک۔ دیوان نا گڈسر اٹی اسیجائی وزارتی کمیشن نا دیوان نا پروٹوکول آ ہم دستخط کننگا۔ نائب وزیراعظم نا رِد اٹ اجلاس اٹی واپار، زرکاری، کشت و کشار، میری ٹائم کمکاری تون اوار چندی بشخ آتیٹی کمکاری ودفنگ نا گمان تیا سرجم گپ و تران کننگا۔ او پارے کہ پاکستان و بحرین تینا تین پہ تینی زرگزرانی و واپاری رابطہ غاتے پوسکن آ کہول اسکان سر کننگ کن سنبرینگوک ءُ۔ اسحاق ڈار پارے کہ پاکستان فلسطین نا آزادی و فلسطینی الس نا حقِ خودارادیت نا مخ تفی نا دوارگی ءِ کرینے۔ ڈیہہ انا ساڑی حالیت نا رد اٹ او سفارت کاری نا اہمیت آ زور شاغسا پارے کہ ڈیہہ انا جھیڑہ غاتا ایسری و امن نا شونداری کن مذاکرات و سفارتی کوشست آک المی ءُ۔ نائب وزیراعظم پارے کہ پاکستان و بھارت نا نیام اٹی ساڑی جنگ انا دے تیٹی ہم بحرین پاکستان تون پدریسہ رابطہ ٹی ئس، ہراڑان ہڑتوم آ ملک آتا نیام اٹی خڑک ایلمی تعلقداری و تین پہ تینی پتداری نا ڈیک ملک۔ بحرین نا وزیرِ خارجہ ڈاکٹر عبداللطیف بن راشد الزیانی اسیجائی نیوز کانفرنس آن تران کرسا پاکستان نا کماشی و الس نا کنڈ آن گچین مہمان نوازی آ منت وار اُن۔او است خواہی نا درشانی کرے کہ نن واپار ءِ دوکچ کننگ خوانہ۔