پاکستان اقوام متحدہ نا امن مشن تیٹی تینا پبی کڑد ءِ برجاتخک،بنجائی وزیر داخلہ محسن نقوی

اسلام آباد، اقوام متحدہ نا سیکرٹری جنرل انتونیو گوتریس وزارتِ داخلہ نا دورہ ءِ کرے۔ ہراڑے او بنجائی وزیر داخلہ محسن نقوی و وزیر مملکت طلال چوہدری تون اوڑدہی کرے۔ وزارتِ داخلہ غان جاری بیان نا رداٹ اوڑدہی نا وخت آ جہانی و علاقائی سلامتی نا حالیت و اقوام متحدہ نا امن مشن تا بابت سرجمی اٹ گپ و تران کننگا۔ دا وخت آ سپیشل سیکرٹری داخلہ، ایڈیشنل سیکرٹری داخلہ و ایلو بڑزکو کمامدارآک ہم ساڑی ئسر۔ اوڑدہی نا وخت آ بنجائی وزیر داخلہ محسن نقوی پارے کہ پاکستان دہشت گردی نا برخلاف جہانی جنگ کننگ ءِ۔ او جہانی برادری ءِ خبڑدار کرسا پارے کہ دا وخت آ اوغانستان اٹی 25 دہشت گرد تنظیم سرگرم ءُ ہرا دنیا نا امن کن بھلو خطرہ اسے، و دا خطرہ تون مون تننگ کن دنیا ءِ اسیجائی اٹ گام گیج کروئی مریک۔ وزیر داخلہ پیدوار کرے کہ پاکستان اقوام متحدہ نا امن مشن تیٹی تینا پبی کڑد ءِ برجاتخک، ہراڑے پاکستان پولیس نا آفیسر و کارندہ غاک ہم خذمت سرتننگ ءُ، وخت اس کہ پاکستان امن نا بحالی کن داتم اسکان 181 جان تے ندر کرینے، محسن نقوی قدرتی آفت آتا وخت آ پاکستان نا پبی کمک آسیکرٹری جنرل نا منت واری ءِ ہم ہرفے۔ اقوام متحدہ نا سیکرٹری جنرل انتونیو گوتریس جہانی امن کن پاکستان نا کڑد انا ستاءِ کرسا پارے کہ اقوام متحدہ نا امن مشن تیٹی پاکستان نا بشخ ہلنگ مدام نمان و ستاکڑزوک مسنے، و دنیا نا امن کن پاکستان نا قربانیک گیرام مفسہ۔