پاکستان ترک زمی جمب زہمی تتون ہم کوپہ سلوک ءِ، احسن اقبال

اسلام آباد : بنجائی وزیر ڈٹ بندی، شونداری و اصلاحات احسن اقبال پارینے کہ پاکستان نا حکومت و الس آزمائشت نا دا ساہت اٹی زمی جمب آن زہمی تتون ہم کوپہ سلوک ءُ۔ داخیال آتا درشانی ءِ او تینا کماشی ٹی ترکی ٹی پاکستان نا کنڈ آ کمکی گڑاتا فراوانی و زمی جمب آن زہمی تا بحالی کن دیوان اٹی گپ وتران کرسا کرے۔ دیوان اٹی این ڈی ایم اے، این ایل سی، صوبائی حکومت و وزارت ڈٹ بندی نا کمامدارآک بشخ ہلکر۔ دیوان نا کماشی ءِ کرسا بنجائی وزیر پارے کہ پاکستان نا حکومت و الس آزمائشت نا دا ساہت آتیٹی ترک زمی جمب آن زہمی تتون ہم کوپہ سلوک ءُ۔ اوپارے کہ پاکستانیک غٹ مالی خواری آتیان پد ہم ترکیہ و شام انا زمی جمب آن زہمی تیکن برجا کمکی سرجزآتیٹی زیات بشخ ہلنگ اٹی ءُ۔ بنجائی وزیر این ڈی ایم اے ءِ پارت جاری کرے کہ او کمکی گڑا تا فراوانیءِ ترند کے تانکہ زہمی تسکان وخت آ گڑاتے سرکننگ مرے۔ اوپارے کہ ترکی ٹی کمکی سرجزآتیٹی بشخ ہلوک آ نجی ادارہ غاتا کسر اٹ بست و بندی اڑاند آتے مرکننگ کن تعلقدار ادارہ غاک تینا کڑد ءِ ادا کیر۔ بنجائی وزیر ہائیر ایجوکیشن کمیشن و غٹ تعلقدار بنجائی و صوبائی ادارہ غاتے پارت جاری کرے کہ او ورناتے دا بابت متحرک کننگ کن کیمپ خلیر۔ بنجائی وزیر پارے کہ پاکستان اٹی تدوک آ سال نوکاپ نا بھسکاری تیان بھاز انگا ضلع غاک زہمی مسر، ترکیہ دا وخت آ و اوکان بیدس ہر مشکل ساہت اٹی پاکستان تون تفینے۔ احسن اقبال پارے کہ پاکستان غٹ تر مالی مشکل آتیان پد ہم ترکیہ و شام انا زمی جمب آن زہمی تا بحالی نا کوشست آتیٹی بشخ ہلیک۔ بنجائی وزیر پارے کہ پاکستان نا بھلا کاروباری خواجہ غاک و ادارہ غاک خاص وڑاٹ ملک انا غٹ چیمبرآف کامرس ترکی ٹی زمی جمب آن زہمی تا امداد اٹی مون آ برسا بشخ ہلیر۔ بنجائی وزیر پارے کہ پاکستان اٹی دوائی جوڑ کروک آ کمپنیک زہمی تیکن المی دوائی و فرسٹ ایڈکٹ آتا فراوانی ءِ پک کننگ کن تینا کڑد ءِ ادا کیر۔ بنجائی وزیر پارت جاری کرے کہ دا ہیت ءِ پک کننگے کہ کنوئی آ گڑا و دوائی تا جہانی آب آ پورو سلر۔

(اے پی پی)