ایٹمی پروگرام آ ڈیل انا حوال آک راست افس، پاکستان

اسلام آباد : پاکستان ایٹمی پروگرام آ ڈیل انا حوال آتے مسترد کرسا پارینے کہ ایٹمی پروگرام آ ہیت وگپ اسہ ایجنڈا سے آ ہم اف‘ یوکرین ءِ سلہہ بہا کننگ نا رپورٹ آک راست افس‘ مقبوضہ کشمیر اٹ آبادی نا کچ ءِ بدل کننگ کوزی گیر بھارتی کمامدار آتا غیر کانودی ءُ گام اسے۔ پنچ شنبے نادے ہفتہ وار بریفنگ ترسا ترجمان دفتر خارجہ ممتاز زہرا بلوچ پارے کہ وزیراعظم شہباز شریف اِرا دے انا دورہ غا ترکیہ غا ہنانے ہراڑے او انقرہ ٹی ترک صدر تون اوڑدہی ٹی پاکستان ناکنڈآن ہڑزخواہی کیک۔ پاکستان دا وخت اسکان شام و ترکی کن ککی گڑاتا پوسکن آ کھیپ راہی کننگانے‘ اسہ پاکستانی شاری اس پن ءِ پاش کپننگ آ ترکی ٹی کمکی کارروائی تیکن 30 ملین ڈالر نا خیرات تسنے۔ پاکستان بھارت نا غیرکانودی وڑاٹ کوزہ ٹی جموں وکشمیر اٹی انسانی حق انا بھلا لتاڑتیا گڑتی ظاہر کرسا پارینے کہ مقبوضہ علاقہ ٹی بھارتی فوج انا بھلو کچ اسے آ انسانی حق انا خلاف ورزیک برجاءُ۔ دفترخارجہ نا ترجمان ممتاز زہرا بلوچ پنچ شنبے نادے آ پریس بریفنگ اٹی پارے کہ مقبوضہ علاقہ ٹی ورناکشمیری شمس الدین ولد جمال الدین ادھم پور نا اسہ جاست وپاستی ہند اسے ٹی بیدادی نا شست مننگ آن پد شہید مس ہرادے کم و ود اسہ تُو اس مست اُراغان دزگیری آن پد پدریسہ بیدادی نا شست کننگاسس۔ دفترخارجہ نا ترجمان پارے کہ شمس الدین بے گوا مروک آ اولیکو کشمیری ورنااف و نئے دا انسانی حق انا لتاڑ تا اولیکو واقعہ ءِ۔ اوپارے کہ مقبوضہ کشمیر اٹی ورناتے حراست اٹی و فرضی مقابلہ غاتیٹی شہید کننگ انگ ءِ۔ ترجمان پارے کہ نن مقبوضہ کشمیر اٹی حراست اٹی مروک آ مرک آتا بارواٹی تینا گڑتی تا درشانی ءِ کرسا کرینن۔ اوپارے کہ داوڑنا غیر انسانی کارروائی و انسانی حق انا خلاف ورزی تا زموارآتا محاسبہ بایدے مرے۔ ترجمان داہیت انا درشانی ءِ کرے کہ پاکستان اقوام متحدہ نا سلامتی کونسل نا قرارداد آتا رداٹ جموں و کشمیر نا جھیڑہ نا انصاف اٹ و پرامن ایسری کن تینا کشمیری تا سیاسی، سفارتی و اخلاقی مخ تفی ءِ برجاتخک۔ داکان بیدس دفترخارجہ نا ترجمان ممتاز زہرا بلوچ پنچ شنبے نادے آ پریس حوال اٹی پارے کہ وزیر خارجہ سیکورٹی کانفرنس اٹی گول میز شرہ غاتون اوار چندی پروگرام تیٹی بشخ ہلیک۔ اوپارے کہ بلاول بھٹو زرداری تینا ہم منصب و کانفرنس اٹی شریک راہشون تتون ہڑتوم آ کنڈاتا اوڑدہی کیک۔ ترجمان پارے کہ وزیر خارجہ جرمنی نا دورہ غان پد لتھوانیا نا وزیر خارجہ نا سلہ غا سرکاری دورہ غالتھوانیا غا کاہک۔ وزیرخارجہ بلاول بھٹو زرداری 20 آن 21 فروری اسکان ولنیئس اٹی وزیر خارجہ گیبریلیس لینڈ سبرگس اتون گیشتر امور آ گپ وتران کیک و لتھوانیا نا پارلیمنٹ نا اسپیکر تون اوڑدہی کیک۔ ہڑتوم آ فریق ہڑتوم آ سیاسی سلابت نا قیام نا بابت مفاہمتی یات داشت آتیا ہم دستخط کیرہ۔ ترجمان پارے کہ تینا دورہ نا آخیریکو ریسہ ٹی وزیر خارجہ بلاول بھٹو زرداری 21 آن 22 فروری اسکان ہنگری نا دورہ ءِ کیک و ہنگری نا ہم منصب پیٹر سیجا رٹو تون گپ وتران کیک۔ گپ وتران اٹی فریق آک ہڑتوم آ کنڈآتا غٹ پلو آتیا سجفرہ و علاقائی و جہانی امور آ گپ وتران کیرہ۔ وزیر خارجہ غاک ہڑتوم آکنڈآتا کمکاری نا بابت مفاہمت نا اِرا یات داشت آتیا ہم دستخط کیرہ ہرافتیان اسہ سفارتی اکیڈمی تا نیام اٹ کمکاری و ارٹ میکو ہڑتوم آ ملک آتا نیام اٹ گوازی و تعلیم نا بابت مریک۔

(اے پی پی/ آن لائن)