چناک شونہال، پرامن و شون ہلوک راج اسے نا بنداومریرہ،سید یوسف رضاگیلانی

چنا تے رکھوک، جان جوڑ، خوانوک و باوقار آخبت اس فراوان کننگ ننا اجتماعی زمواری ءِ، چیئرمین سینیٹ

0

Get real time updates directly on you device, subscribe now.

اسلام آباد، چیئرمین سینیٹ سید یوسف رضاگیلانی پارینے کہ چناتے رکھ، جان جوڑ، خوانوک و باوقار آخبت اس فراوان کننگ ننا اجتماعی زمواری ءِ، چناک شونہال پرامن و شون ہلوک راج اسے نا بنداو ءُ۔ سینیٹ سیکرٹریٹ نا رداٹ جہانی یوم اطفال نا وخت آ کلہو اٹی چیئرمین سید یوسف رضاگیلانی پارے کہ چناتا حق انا رکھ، آب اٹ تعلیم، جان جوڑی، غذائیت و بریبر وارخواہی تا فراوانی قومی اولیت آتیٹی بایدے اوار مرے۔ اوپارے کہ ہر چناءِ بیدادی، استحصال، امتیاز و محرومی آن پاک چاگڑد اس فراوان کننگ المی ءِ تانکہ او تینا لائخی تے پبی وڑاٹ کاریم اٹ اتنگ کیر۔ سید یوسف رضاگیلانی پارے کہ چناتیا زرکاری اصل اٹ قوم انا آخبت آ زرکاری ءِ، پارلیمان، حکومتی ادارہ و راج ءِ چناتا حق انا رکھ و اوفتا راجی آسودہی کن اسیجائی گام گیج کروئی مریک۔ چیئرمین سینیٹ دادے تیٹی تھائی لینڈ ناشار بنکاک اٹی سیودی چلڈرن نا کنڈآن کانفرنس اٹی بشخ ہلنگ اٹی ءِ ہراٹی چناتا راجی آسودہی، تعلیم، جان جوڑی و رکھ اکن پالیسی قول آتے گچین بجٹ و عملی گام گیج آتیٹی بدل کننگ نا بارواٹی گپ وتران کننگ انگ ءِ۔ چیئرمین سینیٹ پاکستان نا عزم انا درشانی ءِ کرسا پارے کہ چناتے کن سازگار پالیسی تا مون آ دننگ، پارلیمانی چاروکی نا گچین نظام و قومی شونداری نا عمل اٹی چناتا گرج آتے بنجائی حیثیت تننگ کن گام گیج آتے برجاتخنگک۔ جہانی یوم اطفال نا وخت آ چیئرمین سینیٹ غٹ تعلقدار ادارہ و راج انا چندی تپہ غاتیا زور شاغا کہ او ہندن ءُ راج اسے نا جوڑ کننگ کن تینا کڑد ءِ ادا کیر ہراڑے ہر چناءِ رکھ، تعلیم، شونداری و مون آ ہِننگ نا بریبر وارخواہی دُوبرے۔

Get real time updates directly on you device, subscribe now.

Leave A Reply

Your email address will not be published.