پاکستان اٹ زرکاری کروک آتے بخیر کینہ، اسحاق ڈار

اسلام آباد : بنجائی وزیر خزانہ و محصولات سینیٹر محمد اسحاق ڈار تون چیف ایگزیکٹو آفیسر، ایگزیکٹیو ڈائریکٹر و منیجنگ ڈائریکٹر انٹرنیشنل ہولڈنگ کمپنی (آئی ایچ سی) سید بصر شعیب پنچ شنبے نادے آ داڑے اوڑدہی کرے۔ وزیر خزانہ آئی ایچ سی نا سی ای او ءِ وزیراعظم نا ساڑی آ دورہ و اماراتی پوریاگر و زرکارآتون اونا اوڑدہی تا بارواٹی معلومدار کرے۔ اوپاکستان اٹی زرکاری ٹی است خواہی آ آئی ایچ سی نا انتظامیہ نا منت واری ءِ ہرفے۔ اوہڑتوم آ ملک آتا نیام اٹ اقتصادی کمکاری ءِ ترند کننگ نا وڑوڈول آتیا گپ وتران کرے و ساڑی آ اقتصادی تعلقداری تے پین سوگو کننگ نا است خواہی نا درشانی ءِ کرے۔ وزیرخزانہ پارے کہ پاکستان متحدہ عرب امارات آن مروک زرکاری ءِ بخیر کیک، و پاکستان اٹی زرکاری نا چندی وارخواہی ارے۔ اومستی پارے کہ حکومت پاکستان زرکار و پوریاگر آتے زیات آن زیات آسراتی فراوان کننگ کن چندی اصلاحات آتیا عمل کننگ ءِ۔ سید بصر شعیب ہڑتوم آ ملک آتا نیام اٹ ساڑی آ خوشگوار تعلقداری تے مون آ تخا و پاکستان اٹی زرکاری نا وارخواہی تے راغب کننگ کن حکومت نا کڑد انا ستاءِ کرے۔ وزیرخزانہ سی ای او ءِ پاکستان اٹی اماراتی زرکار آتیکن حکومت پاکستان نا کنڈ آ زیات آن زیات آسراتی فراوان کننگ نا باوری کرفے۔ داکان بیدس بنجائی وزیر خزانہ و محصولات سینیٹر محمد اسحاق ڈار پارینے کہ حکومت و الس آزمائشت نا داساہت اٹی تینا ترک ایلم و ایڑھ تتون سلوک ءُ۔ وزارت خزانہ غان جاری بیان نا رداٹ داخیال آتا درشانی ءِ او ترکیہ نا وزیر خزانہ ڈاکٹر نورالدین نباتی تون ٹیل فون آ گپ وتران کرسا کرے۔ بنجائی وزیر ترکیہ ٹی زمی جمب اٹی مروک آ جونی و مالی نسخان آ ڈاکٹر نورالدین نباتی تون ہڑزخواہی و ہمدردی نا درشانی ءِ کرے۔ وزیر خزانہ باوری کرفے کہ دا مشکل وخت اٹی ہروڑنا امداد نا کمک ءِ کینہ۔ اوپارے کہ حکومت و اونا الس آزمائشت نا داساہت اٹی تینا ترک ایلم و ایڑھ تتون سلوک ءُ۔ ڈاکٹر نورالدین نباتی وزیرخزانہ اسحاق ڈار نا منت واری ءِ ہرفے و زمی جمب آن زہمی تیکن دمدستی کمکی و المی کمک گدریفنگ آ حکومت پاکستان نا ستاءِ کرے۔ او مستی پارے کہ اونا کابینہ نا اوڑدہی ٹی ترک صدر زمی جمب آن زہمی تیکن پاکستان نا کنڈ آ تروک آ امداد نا بھاز ستاءِ کرینے۔

(اے پی پی)