مسکوہی بنجائی وزیر نا ضمانت منظور،اڈیالہ جیل آن یلہ

اسلام آباد : اسلام آباد ہائیکورٹ جسٹس محسن اختر کیانی نا عدالت مسکوہی وزیرداخلہ شیخ رشید نا پنجا ہزار روپئی نا مچلکہ غا ضمانت ءِ منظور کرے‘ عدالت اودے دمدستی یلہ کننگ نا پرمان کرے۔ شیخ رشید نا وکیل سلمان اکرم راجہ و ایڈووکیٹ جنرل اسلام آباد عدالت نا مون آ پیش مس۔ سماعت نا وخت آ عدالت سوج کرے کہ شیخ رشید انت دوبہ خلکنے؟ ہرا نیوز چینل آ بیان بسنے؟ شیخ رشید نا وکیل عدالت ءِ پارے کی جی اؤ او اسہ بیان اس تسوسس ہرا نیوز چینل تیا نشر مس۔ شیخ رشید نا وکیل بیرسٹر سلمان اکرم راجہ شیخ رشید نا برخلاف دوبہ غاتا سرجم آتے عدالت ءِ پارے‘ شاہدی تے ٹی دن ءُ ہچ اف کہ بیان آن پی ٹی آئی و پیپلز پارٹی نا نیام اٹ جنگ مرے۔ داوخت آ ایڈووکیٹ جنرل اسلام آباد جہانگیر جدون تینا دلیل تے ٹی عدالت ءِ پارے کہ شیخ رشید اسہ سینئر ءُ سیاستدان اسے اونا ہیت آک بایدے پارلیمانی مریر‘ ہرا حکومت اٹی ءِ پگہ ہمو اپوزیشن اٹ مریک کل اسہ وڑ انا ہیت کیرہ کل غیر پارلیمانی ءُ۔ ایڈووکیٹ جنرل نا دا ریمارکس آتیا عدالت اٹ کل ٹاکو خلکر۔ شیخ رشید وزیرداخلہ و بلاول بھٹو ءِ پوچ ءُ کرینگ تس۔ شیخ رشید نا وکیل عدالت ءِ پارے کہ دا کیس اف ہرادے ایڈووکیٹ جنرل بیان کننگ اٹی ءِ۔ دا وخت آ پرسجوئی افسر عدالت ءِ پارے کہ شیخ رشید نا بیان نا سرجم آتے پیمرا غان دوئی کننگا۔ شیخ رشید بیان تسنے کہ او دا انفارمیشن ءِ عمران خان آن ہلکنے۔ آصف زرداری نا عمران خان نا برخلاف پاننگوک سازش نا شاہدیک شیخ رشید آن رسینگتوس۔ شیخ رشید آ تھانہ آبپارہ ٹی مقدمہ درج ءِ۔ شیخ رشید داوخت آ جوڈیشل ریمانڈ آ زندان اٹی بند ءِ۔ داوخت آ ایڈووکیٹ جنرل عدالت ءِ پارے کہ اگہ او ڈوہ ءِ دوارہ کپک و انڈرٹیکنگ ایتک تو عدالت جاچ ہلے۔ جسٹس محسن اختر کیانی ریمارکس تس کہ ننے پرائمری اسکول نا نصاب آن ہیلکاری نا چر اس بنا کروئی مریک۔ پڑک آتا وکیل آتا دلیل تے خف توننگ آن پد عدالت پنجا ہزار روپئی نا مچلکہ جمع کرفنگ نا عوض اٹ شیخ رشید نا ضمانت ءِ منظور کرسا اودے دمدستی یلہ کننگ نا پرمان کرے۔

(آن لائن)