امریکہ یو اے ای وزیر خارجہ اوڑدہی، معاہدہ ابراہیم آ عمل آ سجفنگا
اوڑدہی ٹی ہڑتوم آ وزیر خارجہ غاک اسرائیل و فلسطین جھیڑہ ٹی ساڑی آ تُو تیٹی شدت آ ہم گپ وتران کریر
Get real time updates directly on you device, subscribe now.
واشنگٹن : متحدہ عرب امارات نا وزیر خارجہ شیخ عبداللہ بن زاید امریکی ہم منصب انٹونی بلنکن و سینیٹ نا چندی باسک آتون اوڑدہی کرے و تین پہ تینی است خواہی نا چندی امور و ہڑتوم آ کنڈاتا شریداری نا مون آ دننگ نا گمان تیا گپ وتران کرے۔ سعودی خبررساں ادارہ امارات نیوز ایجنسی (وام) نا بابت پارے کہ واشنگٹن ڈی سی ٹی امریکی وزیرخارجہ تون اوڑدہی ٹی متحدہ عرب امارات نا وزیر خارجہ شیخ عبداللہ سلامتی، چاگڑدی بدلی، واپاری تبادلہ و زرکاری ٹی کمکاری ءِ سوگو کننگ نا وڑوڈول آتیا گپ وتران کرے۔ ہڑتوم آ ک دے ٹک نیامی ٹی انتہاپسندی تون مون تننگ و معاہدہ ابراہیم ءِ مون آ دننگ کن تینااسیجائی کوشست آتے مون آ تخار۔ متحدہ عرب امارات، بحرین، مراکش و سوڈان 2020اٹی امریکہ نا خیرخواہی ٹی ابراہیم معاہدہ آ دستخط کریسر و اسرائیل تون تعلقداری تے گنڈاسس، امریکی محکمہ خارجہ نا ترجمان نیڈ پرائس پارے کہ ہڑتوم آ وزیر خارجہ غاک اسرائیل و فلسطین جھیڑہ ٹی ساڑی آ تُو تیٹی شدت آ ہم گپ وتران کریر و بیدادی ٹی پین ودکی ءِ توننگ و امن ءِ بحال کننگ کن گمانی گام گیج آتیا گپ وتران کریر۔ اوزمی جمب آن زہمی ترکیہ و شام اٹی کمکی سرجزآتا جاچ ءِ ہم ہلکر۔ اوساف توانائی نا دوئی کننگ کن متحدہ عرب امارات و امریکہ نا نیام اٹ شریداری (پی اے سی ای) و یواے ای ٹی بروک آ چاگڑدی کانفرنس کوپ 28 نا اڈتننگ نا بابت باندات آ سجفیر۔
(اے پی پی)