محمد بشیر بلوچ نا کزیت بھاز بھلو نسخان اسے، قیوم بیدار

کوئٹہ : براہوئی ادبی سوسائٹی نا ہڑزخواہی دیوان چیئرمین عبدالقیوم بیدار نا کماشی ٹی اڈ ہلک۔ ہراٹی ملک انا پنی آ فوک گلوکار محمد بشیر بلوچ نا کزیت آ اُست ہسونی نا درشانی ءِ کننگا۔ او وخت آ اونا براہوئی و بلوچی ساز و زیمل کن خدمت آتا ستا ءِ کریر۔ او وخت آ ترانکار آک پاریر کہ محمد بشیر بلوچ ریڈیو و ٹی وی نا بنا آن براہوئی فوک گلوکاری ءِ خلسا اودے رکھوک کننگ اٹ اہم ءُ کڑد اس ادا کرے۔ او ساراوانی لہجہ نا نمائندگی ءِ کرسا ملک و پیشن ملک تینا فن انا درشانی ءِ کرے و اینو ہم اونا خلوک آ فوک گائیکی ءِ نیاڑیک برام تا وخت آ خلیرہ۔ او بلوچی کشیدہ کاری نا رنگ و آہنگ ءِ تینا وڑاٹ رنگ شاغسا داوڑاٹ خلک کہ اینو اُلس اونا مثال ءِ پیش کیک۔ محمد بشیر بلوچ براہوئی زبان نا نمائندگی نا بابت اٹ اختر چنال آن پد جوان چاہنگک۔ او پارینے کہ محمد بشیر بلوچ نا کزیت آن براہوئی فوک ادب ءِ بھاز نسخان مسنے۔ داوڑ نا فنکار آک سد آ سال آتیان ہم پد ودی مریرہ۔ دا ہڑزخواہی دیوان اٹ افضل مرادؔ، نورخان محمد حسنی، اے ڈی بلوچ، پروفیسر خدادادگل، پروفیسر سوسن براہوئی، پروفیسر حسین بخش ساجدؔ، حاجی نادر شاہوانی، انور زیبؔ، مطلب مینگل، عبدالرازق سرپرہ، عبدالرزاق صابرؔ (جونیئر)، احسن شاہوانی، عزیز بیدارؔ و حافظ اورنگزیب اسک بشخ ہلکر او وخت آ اوڑکن ہڑزخواہی کریر۔

(پ ر)