کوہلو، آپریشن نا وخت آ دھماکہ، پاک فوج نا میجر و کیپٹن اس شہید
انٹیلی جنس حوال آ علاقہ ٹی سینیٹائزیشن آپریشن نا وخت آ آئی ای ڈی دھماکہ اس مس، آئی ایس پی آر
Get real time updates directly on you device, subscribe now.
کوئٹہ: بلوچستان ناعلاقہ کوہلو ٹی آپریشن نا وخت آ دھماکہ نا سوب آن پاک فوج انا میجر و کیپٹن اس شہید مس۔ حوال نا رد اٹ بلوچستان نا علاقہ کوہلو ٹی آپریشن نا وخت آ آئی ای ڈی دھماکہ نا سوب آن پاک فوج انا اِرا افسر شہید مسر۔ پاک فوج انا شعبہ تعلقات عامہ آئی ایس پی آر نا رد اٹ سکیورٹی فورس آتا کنڈآن بلوچستان نا علاقہ کوہلو ٹی پک انٹیلی جنس ڈہ آ سینیٹائزیشن آپریشن کننگا۔ آئی ایس پی آر نا رد اٹ علاقہ نا کلیئرنس نا وخت آ آئی ای ڈی دھماکہ مس ہرانا سوب آن 2 افسر شہید مسر۔ شعبہ تعلقات عامہ نا رد اٹ مادر وطن نا رکھ اکن میجر جواد و کیپٹن صغیر شہید مسر۔ آئی ایس پی آر نا رد اٹ امن دشمن تے دزگیر کننگ کن علاقہ ٹی کلیئرنس آپریشن برجاءِ‘ دشمن تا لغوری آ کارروائیک بلوچستان نا امن‘ شونہالی ءِ لتاڑ کننگ کپسہ‘ سکیورٹی فورس آک جان ندر کرسا امن دشمن تا ارادہ غاتے بے سہب کننگ کن پرعزم ءُ۔ وزیراعلیٰ بلوچستان میر عبدالقدوس بزنجو کوہلو ٹی سرچ آپریشن نا وخت آ سکیورٹی فورس آتیا آئی ای ڈی دھماکہ نا مذمت ءِ کرسا دھماکہ ٹی سکیورٹی فورس آتا اِرا افسر نا شہید مننگ و مسہ کارندہ نا ٹھپی مننگ آ ارمان و است ہسونی نا درشانی کرینے۔ وزیراعلیٰ شہید افسر آتا خاہوت آتتون ہڑزخواہی و ہمدردی درشان کرسا پارے کہ وطن نا نرزور آ ماک لمہ وطن نا رکھ اکن تینا جان تے ندر کریر‘ ملک انا رکھ اکن تینا جان تے ندر کروک آک ننا ہیروک ءُ‘ وزیراعلیٰ پارے کہ الس دہشت گرد و اوفتا ارادہ غاتے رد کیک‘ نن دشمن نا ناپاک انگا ارادہ غاتے سرسہب مننگ کن الیپنہ۔ وزیراعلیٰ شہید آتا درجہ غاتا بڑزی‘ خاہوت آتا صبر و ٹھپی تا زوت دراخ جوڑی کن دعا کرینے۔ صوبائی وزیرداخلہ میر ضیاء اللہ لانگو کوہلو آئی ڈی دھماکہ ٹی سیکورٹی فورس آتا شہید مننگ آ ڈکھ وارمان کرینے۔ وزیرداخلہ شہید افسر آتا خاہوت آتتون ہڑزخواہی ہم کرینے۔ وزیرداخلہ پارے کہ شرپسند آتا لغوری آ کارروائی تیان ننا حوصلہ غاک نزور مننگ کپسہ۔ وزیرداخلہ ضلعی انتظامیہ ناا فسر آتے پرمان کرے کہ واقعہ نا ٹھپی تے درمان نا آسراتی فراوان کے‘ او پارے کہ ڈکھیا خاہوت نا ڈکھ اٹ بریبر نا شریدار ان‘ او واقعہ ٹی شہید مروک افسر آتا درجہ غاتا بڑزی و ٹھپی تا زوت و پورو دراخ جوڑی کن دعا ہم کرے۔
(آن لائن/ خ ن)