آجو زرگزران کن وزیراعظم پاکستان نا عزم انا ستاءِ کینہ، آئی ایم ایف

اسلام آباد :  جہانی مالیاتی فنڈ (آئی ایم ایف) آجو زرگزران نا سوگوی کن درکار پالیسی تیا عملدرآمد کن وزیراعظم پاکستان نا عزم انا ستاءِ کرسا پارینے کہ پاکستان اٹی تہہ و پیشن بے بریبری ءِ مر کننگ کن پالیسی گام گیج آتیا جوان پیش رفت مسنے۔ داہیت ءِ آئی ایم ایف نا کنڈ آن آئی ایم ایف مشن نا دورہ نا ایسری آ جاری مروک اسہ بیان اسے ٹی پاننگانے۔ بیان اٹی پاننگانے کہ ناتھ پورٹر نا کماشی ٹی جہانی مالیاتی فنڈ انا مشن 31 جنوری آن 9 فروری ٹی اسلام آباد نا دورہ ءِ کرے و آئی ایم ایف نا ودکی فنڈ آسراتی (ای ایف ایف) پروگرام نا رداٹ نویں جاچ اکن رداٹ گپ وتران کرے۔ بیان اٹی آئی ایم ایف نا آجو زرگزران نا سوگوی کن درکار پالیسی تیا عملدرآمد کن وزیراعظم پاکستان نا عزم انا ستاءِ کننگانے و تعمیری گپ وتران کن پاکستانی کمامدارآتا منت ءِ ہرفنگانے۔ بیان اٹی پاننگانے کہ گپ وتران اٹی پاکستان اٹی تہہ و پیشن نا بے بریبری ءِ مر کننگ کن پالیسی گام گیج آتیا جوان پیش رفت مس۔ پاکستان وآئی ایم ایف نا نیام اٹ گپ وتران اٹی محصولات کن آخبتی گام گیج آتون مالیاتی پوزیشن ءِ سوگو کننگ، غیر اہدافی زرتلافی تیٹی کمتی، راج انا زرگزرانی وڑاٹ نزور تپہ و نوکاپ آن زہمی بندغ آتا کمک کن راجی رکھ ءِ ودفنگ، زرمبادلہ نا کمتی ءِ پدریسہ چٹفنگ کن زرمبادلہ نا کچ ءِ مارکیٹ نا رداٹ کننگ، گردشی وام تے پین جمع مننگ آن توننگ، توانائی نا بشخ اٹی اصلاحات و پالیسی تا نفاذ آ چکار کننگا۔ بیان اٹی پاننگانے کہ پالیسی تا نفاذ نا سرجم آتے گڈیکو دروشم اس تننگ کن بروک آ دے تیٹی پاکستان و آئی ایم ایف نا نیام اٹ ورچوئل گپ وتران برجاسلک۔

(اے پی پی)