عمران نا بیان پی پی سرکڑدہ غاتا جان اکن خطرہ اسے، خواجہ آصف
رجیم چینج نا دوبہ ءِ امریکہ غان محسن نقوی اسکان سر مس، سانحہ اس مس تو زموار تے عمران خان مریک، وزیر دفاع
Get real time updates directly on you device, subscribe now.
اسلام آباد : وزیر دفاع خواجہ محمد آصف پارینے کہ عمران خان نا رجیم چینج نا دوبہ امریکہ غان ہلیس داسہ محسن نقوی اسکان سرمسنے‘ عمران نا بیان آن پیپلز پارٹی نا سرکڑدہ غاتا جان تے خطرہ مننگ کیک‘ ملک اٹ سانحہ اس مس تو اونا زموار عمران خان مریک۔ سیالکوٹ اٹ پریس کانفرنس کرسا وزیر دفاع خواجہ آصف پارے کہ عمران خان آصف زرداری آ اودے کسفنگ نا سازش نا دوبہ خلسا ہیت ءِ بدل کرینے ہراکہ سیاست نا رخ ءِ بیدادی ناکنڈآ دننگ نا کوشست اسے‘ ننا سیاست اٹ دا وڑ انا واقعہ نئے داکان مست مسے و نئے داکان پد مریک۔ سیاسی اختلاف آک مرسا کیرہ و داکان پد ہم مرسا کیرہ۔ عمران خان پوسکن ءُ پتہ اس گوازی کرینے ہراڑان کشت وخون مننگ کیک‘ اوپارے کہ عمران خان ملک انا زرگزرانی بھسکاری نازموار ءِ‘ اونا دوبہ امریکہ غان بنا کرسا محسن نقوی آ سرمسنے‘ ہرا وڑ سیاست نا رخ ءِ بدل کننگ انگءِ داڑان بھلو بددیانتی پین مننگ کپک‘ اوپارے کہ پیپلز پارٹی دہشتگردی نا برخلاف جنگ اٹ بھاز قربانی تسنے‘ دہشتگردی نا جنگ اٹ بینظیر بھٹو شہید مس‘داخس بھلو قربانی آن پد ہم پیپلز پارٹی سیاسی جہد ءِ برجا تخا‘اوپارے کہ سیاسی راہشون تے دروغ نا دوبہ و مقدمہ غاتے ٹی بایدے بندی کننگپ‘ سیاسی بیر ہلنگ نا سخت خلاف اُٹ‘ اگہ خدا کپ بھلو سانحہ اس مس تو دانا زموار عمران خان مریک۔ وزیرِ دفاع پارے کہ اگہ سیاسی وڑ اٹ ہیت کننگے تو کس ایکشن ہلپک‘ ادارہ غاتے دھڑکو تننگا تو کانود حرکت اٹ بریک۔آصف زرداری، نواز شریف، پی ڈی ایم نا سرکڑدہ غاک دزگیر مننگ کیرہ تو دا دیر ءُ‘دافتیا تو دوبہ غاک راست ءُ بایدے اوفتے دزگیر کننگے‘ شوق اٹ دزگیری مفک باقاعدہ کانود نا وڑ اٹ دزگیر کننگک۔ ن لیگی راہشون پارے کہ عمران خان اسہ دے اٹ کیہی وار ہیت آتے بدل کیک‘ استیفہ غاک منظور مسر تو داسہ پارہ کہ عدالت آ کانہ‘ ہراتم استیفہ غاک منظور مننگ بنا کریر تو پاریر کہ اسمبلی آ پدی بننگ خوانہ۔ عمران خان استیفہ تس و اسمبلی نابرخلاف بیان تس‘ نن جعلی آخا اصلی استیفہ منظور کرینن‘ نن توار کرین کہ ببو توبتوس‘ استیفہ غاک منظور مسرتو دُدینگ اٹ بسر۔ عمران خان بنی گالہ غان وزیراعظم ہاؤس آ بننگ کن 95کروڑ خڑچ کرے۔ اوپارے کہ آئی ایم ایف نا شڑت آک سخت ءُ ہرا تپّہ غاک باریم ہرفنگ کیرہ اوفتیا باریم تخنگک ہرافک ہرفنگ کپسہ اوفتے ریلیف تننگک۔ پرویزالہی نا ہیت آتیان پد کن تون پاننگ کن پین ہیت اف۔
(آن لائن)