ڈیرہ غازی خان، دہشتگردی تور محکمہ نا کارروائی، 2 دہشتگرد خلنگار

ڈیرہ غازی خان: ڈیرہ غازی خان اٹ محکمہ انسداد دہشتگردی (سی ٹی ڈی) پنجاب دہشتگرد آتا برخلاف کارروائی ٹی تحریک طالبان پاکستان (ٹی ٹی پی) نا 2 کارندہ ءِ خلک۔ محکمہ نا ترجمان دعویٰ کرینے کہ محکمہ انسداد دہشتگردی ڈیرہ غازی خان ءِ پک ڈہ رسینگاسس کہ ٹی ٹی پی نا 4 دہشت گرد وہاوا پولیس نا دنگ اٹ ساڑی موضع جھنگی نا ٹرائی بارڈر ایریا ٹی ساڑی ءُ‘و او ضلع ٹی منہ چیک پوسٹ آتیا جلہو کننگ خوارہ۔ ترجمان محکمہ انسداد دہشتگردی دہشت گرد آتے روئید خان و حنیف اللہ خان ناپن اٹ درست کرے ہرافتا تعلقداری خیبرپختونخوا نا علاقہ شبقدر آن ءِ‘ اودعوی کرے کہ او دہشت گردی ناواقعہ و خیبر پختونخوا، اسلام آباد، راولپنڈی، لاہور و پنجاب نا ایلو شار تے ٹی کانود نافذ کروک ادارہ غاتادفتر تا جاسوسی ءِ ہم کریرہ‘ او پارے کہ محکمہ انسداد دہشتگردی نا ٹیمک ہمو ہند آسر مسر‘ ٹیم تے خننگ آ دہشت گرد آک سم کاری کریر۔ محکمہ انسداد دہشتگردی نا ٹیمک آپریشنل تکنیک ءِ کاریم اٹ اتسا تینے بچفیر و ورندی کارروائی کریر‘ او پارے کہ روئید خان و حنیف اللہ خان تینا سنگت آتا سم کاری آن خلنگار وخت اس کہ ایلو دوبہ دار نن انا تارمئی نا سوب آن نرنگ اٹ سرسہب مسر۔ محکمہ انسداد دہشتگردی واقعہ نا ہند آن 40 سم تتون اوار اسہ کلاشنکوف، 10 سم و اسہ پشٹول، منچر‘ 2 ڈیٹونیٹر و 2 دستی بمب دوئی کرے۔ محکمہ انسداد دہشتگردی نا ٹیمک نروک دہشتگرد آتے دزگیر کننگ کن سرچ آپریشن نا بنا ءِ کرے۔ یات سلے کہ دا کارروائی منہ ہفتہ مست جھنگی چیک پوسٹ آ ٹی ٹی پی نا جلہو آن پد کننگا ہراٹی پولیس نا اسہ کارندہ اس شہید مسوسس۔

(آن لائن)