پٹرول و ڈیزل نا نہاد آک بال کریر، اسہ لیٹر 35 روپئی کبین

اسلام آباد : حکومت پٹرولیم نا نہاد آتے ٹی بھلو ودکی اس کرے۔ حکومت پٹرول، ڈیزل و گاسلیٹ ءِ کبین کرے۔ پٹرول و ہائی اسپیڈ ڈیزل نا نہاد اٹ 35 روپئی فی لیٹر ودکی کرے۔ پٹرول ناپوسکن آ نہاد 249 روپئی 80 پیسہ فی لیٹر مس۔ہائی اسپیڈ ڈیزل کبین مرسا 262 روپئی 80 پیسہ مس۔ گاسلیٹ و لائٹ اسپیڈ ڈیزل ءِ 18 روپئی فی لیٹر کننگانے‘ گاسلیٹ 189روپئی 83 پیسہ نا مس وخت اس کہ لائٹ اسپیڈ ڈیزل187 روپئی نا مسنے۔ وزیر خزانہ اسحاق ڈار پریس کانفرنس کرسا پارے کہ پٹرول نا مصنوعی تنکی نا حوال آک بسر و جہانی منڈی ٹی پٹرول نا نہاد ہچ مف 11 درسَد اسکان ودا ننے دا کل گڑاتے ہُروئی تمک۔ او پارے کہ پٹرول نا نہاد اٹ 50 روپئی فی لیٹراسکان ودفنگ نا ہیت آک مسرہ‘ گدرینگوک آ چار تُو اٹ اسہ وار ہم پٹرول نا نہاد آتے ودفنگتو بلکہ پٹرول و ڈیزل نا نہاد اٹ بیست روپئی اسکان کمتی کننگا وخت اس کہ گاسلیٹ و لائٹ ڈیزل نا نہاد اٹ 29 و 30 روپئی نا کمتی کننگا‘او پارے کہ اوگرا ناکنڈآن سلاہ تننگا کہ پٹرول نا مصنوعی تنکی ءِ چٹفنگ کن نہاد آتے ودفنگے‘اوپارے کہ وزیراعظم شہباز شریف نا پرمان و اسٹیٹ بینک اناکنڈآن جاری کروک روپئی نا قدر انا حساب کتاب ءِ مون آ تخسا پٹرول و ڈیزل نا نہاد اٹ 35، 35 روپئی فی لیٹر وخت اس کہ لائٹ ڈیزل وگاسلیٹ نا نہاد اٹ 18، 18 روپئی فی لیٹر ودفنگ نافیصلہ کننگانے۔ وزیر خزانہ اسحاق ڈار پارینے کہ پٹرولیم نا نہاد اٹ ودکی نا اطلاق یک شنبے نا سہب انا یانزدہ بجہ غان مریک۔ بنجائی وزیرِ خزانہ دا ہم پارے کہ ملک اٹ پٹرول نا ہچ ءُ کاختی اس اف‘ مصنوعی کاختی کننگ انگ ءِ۔ وزیر خزانہ پارے کہ جہانی کہول آ پٹرول نا نہاد اٹ ودکی و اسٹیٹ بینک انا گام گیج آتاسوب آن روپئی نا قدر اٹ مروک کمتی آن پد ہم وزیراعظم نا پرمان آ اوگرا نا سلاہ اٹ پٹرول نا نہاد اٹ کم آن کم ودکی کننگ نا فیصلہ کننگا۔

(آن لائن)