ضمنی گچین کاری، عمران خان ولدا کل 33 نشست آ تنیا اومیتدار

اسلام آباد : پاکستان تحریک انصاف پڑو کرینے کہ قومی اسمبلی نا 33 نشست آ مروک ضمنی گچین کاری تے ٹی پارٹی چیئرمین عمران خان اومیتدار مریک۔ پی ٹی آئی کور کمیٹی نا دیوان آن پد میڈیا تون ہیت وگپ کرسا شاہ محمود قریشی پارے کہ اینو عمران خان نا کماشی ٹی کور کمیٹی و پارلیمانی کمیٹی نا دیوان اڈہلک ہراٹی پاکستان نا سیاسی و زرگزرانی حالیت آتا جاچ ءِ ہلنگا‘ اوپارے کہ قومی اسمبلی نا 33 حلقہ ٹی مروک ضمنی گچین کاری تے ٹی بشخ ہلنگ نا فیصلہ کرینن او پارے کہ کل حلقہ غاتے ٹی عمران خان اومیتدر مریک و ہموکان ڈی نوٹیفائی مروک اسمبلی ناباسک آک کورنگ اومیتدار نا وڑ اٹ تینا کاغد آتے جمع کرفر‘ اوپارے کہ تحریک انصاف سیاسی پڑ اٹ ساڑی مریک‘ قوم نن تون تفوک ءِ‘ 17جولائی نا گچین کاری تے ٹی ہم الس ننا حق اٹ فیصلہ کریسس‘ یات سلے کہ الیکشن کمیشن قومی اسمبلی نا 33 خورک مروک نشست آتیا ضمنی گچین کاری تا شیڈول جاری کرینے ہرانا رد اٹ قومی اسمبلی نا 33 خورک مروک نشست آتیا ضمنی گچین کاریک 16 مارچ آ مریرہ ہراڑکن پندار کاغد 6آن 8 فروری اسکان جمع کرفنگ مریک۔ یات سلے کہ تدوک آسال 17 جولائی آ عمران خان قومی اسمبلی 7 نشست آ گچین کاری تے ٹی بشخ ہلکوسس و اسہ نشست اسے آن با تسوسس۔

(مانیٹرنگ ڈیسک)