لسبیلہ، کوچ اسے نا ہشنگ انگ آن 41مسافر زوال

بیلہ : بلوچستان نا علاقہ لسبیلہ ٹی پیش بروک روڈ شکست اٹ کوچ انا تمنگ و اوٹی خاخر لگنگ نا سوب آن 41مسافر زوال مسنو‘ کوچ پورو وڑ اٹ ہشنگا‘ مسہ ٹھپی ءِ خراب حالیت اٹ کراچی آ گدریفنگا۔ حوال نا رد اٹ گدرینگوک آ نن کوئٹہ غان کراچی آ ہنوک مسافر کوچ بیلہ نا علاقہ چینکی اسٹاپ نا خڑک آ پول آن شیف تما و اوٹی خاخر لگا‘ خاخر مچ آ کوچ ءِ تینا پلویڑ اٹ ہلک‘ کوچ اٹ سوار مسافر آک بے حال مسر خاخر ترند مرسا ہنا‘ شکست نا ڈہ رسینگ آ فائر بریگیڈ گاڈی و ریسکیو کارندہ غاک شکست نا ہند آسر مسر۔ اے سی بیلہ نا رد اٹ مسافر کوچ اٹ 48 مسافر سوار ئسر‘ ہراٹی نیاڑی‘ چنا و کوچ انا کارندہ غاتتون اوار 41بندغ ہشنگ انگ ناسوب آن زوال مسر‘ وخت اس کہ مسہ ٹھپی ءِ کراچی آ گدریفنگا ہرافتا حالیت خراب ءِ‘ لاشک درست مفسہ۔ اسسٹنٹ کمشنر بیلہ سمیع آغا پارے کہ لاش تے درست کننگ کن کراچی آ گدریفنگک تاکہ اوفتے ڈی این اے نا کمک اٹ درست کننگ مرے‘ مستی جاست پاست ہندی انتظامیہ کننگ اٹی ءِ‘ شکست اٹ زوال مروک آتا تعلقداری صوبہ نا جتا جتا علاقہ غاتیان ءِ‘ زوال مروک آتے ٹی اسہ خاہوت نا پنچ بندغ ہم اوار اریر۔ وزیراعلیٰ بلوچستان میر عبدالقدوس بزنجو بیلہ ٹی کوچ شکست آ ڈکھ وارمان کرسا پرمان کرینے کہ ٹھپی تے درمان نا آسراتی فراوان کننگے۔وزیراعظم محمد شہباز شریف ضلع لسبیلہ ناعلاقہ ٹی بس شکست آ ڈکھ وارمان کرینے‘تینا بیان اٹ وزیراعظم شکست اٹ زوال مروک آتا درجہ غاتا بڑزی کی دعا و اوفتا خاہوت آتتون است ہسونی نا درشانی کرینے، وزیراعظم شکست اٹ ٹھپی مروک آتا زوت دراخ جوڑی کن دعا کرے و ٹھپی تے ہر وڑ انا طبی آسراتی فراوان کننگ ناپرمان کرے۔بنجائی وزیرداخلہ رانا ثناء اللہ خان لسبیلہ بس شکست اٹ نہادی جان تا زیان آ است ہسونی نا درشانی کرسا بس شکست اٹ زوال مروک آتا تینائی تتون ہڑزخواہی کرینے تینا بیان اٹ وزیرداخلہ پارے کہ ڈکھ انا دا سات اٹ زوال مروک آتا خاہوت آتا غم اٹ اوار ان‘ وزیرداخلہ بس شکست اٹ زوال مروک آتا مغفرت و اوفتا خاہوت آتیکن صبر انا دعا کرے۔قائمقام گورنر بلوچستان میر جان محمد جمالی لسبیلہ کوچ شکست اٹ انسانی جان تا زیان مننگ آ ڈکھ و ارمان کرینے‘ تینا بیان اٹ قائم مقام گورنربلوچستان ٹھپی تے درمان نا آسراتی فراوان کننگ نا پرمان کرے‘ او ماتنی خاہوت آتتون است ہسونی نا درشانی کرسا پارے کہ غم انا دا سات اٹ نن ماتنی تتون اوار ان‘او زوال مروک آتا مغفرت و ٹھپی تا زوت دراخ جوڑی کن دعا کرے۔

(آن لائن)