شاعر قیصر خان فقیرزئی، و لول کبو لولی شئیر انا راجدپتر

واجہ لطیف الملک بادینی بلوچ

By Hafeez Baloch Last updated نومبر 28, 2021

Get real time updates directly on you device, subscribe now.

قیصر خان فقیرزئی خلق بٹو نوشکے ٹی 1870ء اٹی ودی مس، اونا باوہ نا پن فقیر تاج محمد ئس، فقیرزئی دا سوب آن پاریرہ کہ اوفک صاحب کرامات فقیر جمعہ نا اولیاد ئسرہ۔ فقیر جمعہ، ہارون جیئند زئی نا مار ئس۔ جیئندزئی بادینی نا اسہ طائفہ اسے۔ دا بنداو آ رخشانی و فقیرزئی نا لقب اودے لمہ گودی نا خذمت آن ملا۔ اوفتا بنداوی آ ہنکین تافوئی مسنے۔ او اسہ حاضر جواب ءُ بندغ اس ئس۔ او بلوچی و براہوئی نا اسہ بھلو پنی ءُ شاعر اس مسنے۔ اونا شاعری بندغ اٹ بیداری تون اوار جوز و جوزہ ودی کیک۔ و اونا شاعری ٹی اسہ زیبائی اس خننگک۔ او لوز آتے اسہ زیبا ءُ وڑ اسے ٹی خلانے، ہندا سوب آن اوٹی چس و مزہ، سادہی خننگک۔ و ہر اسٹ ءِ اونا شاعری خواننگ تون اوار یات مریک۔ انتئے کہ اوٹی روانی ارے۔ اونا شاعری نا بند آتا کڑیک اسٹ ایلو تون خڑکی تخرہ۔ اگہ نن داڑے دا پان کہ او اسہ باغ و بہار نا پیم انا بندغ اس مسنے، گڑا دا ہیت اسُل تینا جاگہ غا پک مریک۔ بلوچی و براہوئی نا دا پنی آ شاعر ءِ چنکی آن شاعری نا شوق مسنے، او ایہن بھاز شئیر پارینے، ولے اِرا شئیر آن او مدامی کن زندہ مس۔ اسٹ شہید میر علی دوست نا شئیر و ایلو اوتمان محمد حسنی نا داستان ءِ۔

شہید میر علی دوست نا باوہ نا پن شاہ دوست مسنے، و اونا پیرہ نا پن میر مزنگ خان سناڑی زہری مسنے۔ پٹ و پول آن دا معلوم مس کہ دا وخت آ میر علی دوست بے پد ءِ۔ اونا پد آن ہچ ءُ اولیاد اس اف۔ اونا مار انا پن مزنگ خان مسنے، مزنگ خان نا بیرہ اسہ ایڑھ گودی اولیوک چنا نا ودی مننگ آ کزیت کرینے۔ اوکان پد گڈ میر علی دوست نا پد دنیا ءِ فانی آن مدامی کن چٹا۔ میر علی دوست انگریز آتا برخلاف جہاد نا پڑو کرے، و تینا ڈغار آ فرنگی نا گام ءِ توننگ کن تینا ساہ ءِ ندر کرے و 1933ء اٹ شہادت نا پیالہ ءِ نوش کرے۔ و اودے نوشکے بازار نا قبرستان اٹ شرف اٹ جہہ و جاگہ کننگا۔ اونا جنازہ ءِ ملا عبدالستار نوشکوی خوانانے۔ پارہ کہ دفن کننگ نا وخت آ اونا لمہ گودی سراوان آن اِرا دانہ خل اونا قبر اکن ایسوسس۔ رند آ اوفتے شہید نا قبر انا سرون آ جک کریر۔ دعا غان پد لمہ گودی و اونا بندغ آک نوشکے آن سراوان کن راہی مسر۔ نوشکے نا مخلوق اودے اسہ بھلو شرف اسے تون اوار شار آن پیشن ٹکر اس درے۔ و موکل کرے۔ ولے شہید میر علی دوست تاریخ اٹ مدام زندہ و سلامت ءِ۔ دا جنگ انا کل واقعہ ءِ شاعر قیصر خان فقیرزئی تینا زیبا انگا شاعری ٹی اسہ جوان ءُ وڑ اسے ٹی مون آ ایسنے۔ ہندا پنی آ شاعر قیصر خان فقیر زئی 1961ء نا سال کزیت کرے۔ اینو ہم فقیر جمعہ و فقیر قیصر خان فقیرزئی نا مزار آک تافوئی نوشکے ٹی ءُ۔ ولے او تینا شاعری تون مدام نن تون اوار ءِ۔ لولی مدام لمہ نا زبان آ مریک، چنا اخہ در تکلیف اٹی مریک، لمہ نا لولی اودے آرام ایتک۔ دا زیبا غا لوز بلوچی و براہوئی شاعری نا اسہ بشخ اسے و براہوئی شاعری ٹی کنا خیال اٹ اولیکو وار میر علی دوست و اونا سنگت آتے کن کاریم اٹ اتنگانے۔ دا بولی داسکان غازی تے مہر انا جلونٹ اٹی نازیفک۔ ہرا بندغ آک فرنگی نا سازش اٹی غازی تا خلاف ئسر۔ اوفتے کس اس جوان پاپک۔ شاعر قیصر خان فقیرزئی نا دا زیبدار انگا شئیر ءِ زباد آتتون وخت اس کہ شہید میر علی دوست نا لمہ بنگ، تو اودے سراوان آ خواہفے۔ اوڑان ہندا بے مٹ انگا شاعری ءِ بنگ۔ و پارہ کہ اودے اسہ جوان ءُ ہچ مہاری اس ٹیکی اٹ ہم تسنے۔ او ہمو دور و زمانہ اٹ اسہ بھلو گڑاس ئسکہ۔ ہندا تاریخی انگا شئیر انا بند و کڑیک مسہ سد آن بڑزا مسنو، ولے ننے دانا دوسد و ہفتاد کڑی پٹ و پول نا رد اٹ دو بسنے۔ دا شئیر ءِ شاعر دینار تینا گٹ اٹ ترنم اٹ پارینے، راستی اٹ شاعر دینار بلوچی و براہوئی نا اسہ بھلو پنی ءُ شاعر اس مسنے۔ اونا تعلقداری چاگئی (چاغی) آن مسنے۔ او مست انا جنگ آتے و داستان آتے تینا شاعری نا انداز اٹ بھاز جوان پارینے۔ مست انا شاعر آک شئیر پارینو و اوفتے تینا گٹ اٹ پارینو۔ شہید میر علی دوست نا شئیر کہ اودے قیصر خان فقیر زئی نوشتہ کرینے، او تینا بند و کڑی تتون دا وڑ ءِ:

کیو اول یات ای رب سوب ساز ءِ

کس اکن پرواہ اف تے بے نیاز ءِ

جوڑ کیک کل ءِ بندہ نا راز ءِ