(خرین آ ہیت آک) است انا جہانی دے دیر کن؟

اینو دا نوشت ءِ لکھنگ ئسٹ، اینو نا دے 29 ستمبر ءِ، ہرا کہ است انا ناجوڑی تا جہانی دے ءِ۔ ہر بندغ مال و زر دنیا نا رند اٹ لگانے۔ داڑے است کس ءِ یات بفک۔ نئے است والا تے قدر ارے۔ دنیا ٹی پین انت حال حوال ءِ، تینا جاگہ غا۔ ولے داڑے است والا تے مدام خوار و زار خنانٹ۔

مخلوق اوفتے گنوک پاہک۔ نن ہمو راج اٹی زندہ اُن، ہرادے دانشور اسے نا پاننگ نا رد اٹ ”تیزاب اٹ غسل تننگ نا گرج ءِ۔“ رشوت، حرام خوری، زیات آن زیات امیر مننگ، ملاوٹ، دھوکہ، فراڈ، ہنداخس زیات مسنو کہ اسہ اِرا انقلاب بلکن مچ آ نظام ءِ تیزاب اٹ غسل تننگ نا گرج ءِ۔ زوراور حاکم آک تینا تخت و بادشاہی ءِ سوگو کننگ کن سیاست اٹی رشوت ءِ لس کریر۔ ولدا ہمو بندغ آتے سیاست اٹی اتنگ ءُ، ہرافک اوتا تخت ءِ سوگو کیرہ۔ اسُل کہ اخس بھلو راشی، رشوت خور اس مرے۔ دا گملہ و چمن تے ٹی ترکوک آ سیاستدانک گلی گلی، کوچہ کوچہ ٹی تین کن چمچہ و لالچی ءُ بندغ ودی کرسا حرام خوری، رشوت، چمچہ گری ءِ لس کریر۔ ایلو پارہ غا سرکاری ادارہ و دفتر آک رشوت نا گڑھ جوڑ مسنو۔ مچ آ شار انا حالیت بد حال ءِ۔ کروڑ آ ارب آ روپئی تا فنڈنگ منہ حرام خور انا جیب اٹی کاہک۔ نئے تعلیم نا آسراتی اسے، نئے جانجوڑی۔ روڈ آک پنوک ءُ۔ نالی گٹر تا دیرک گلی تیٹی وہنگ ءُ۔ مچ آ راج انا رجحان مدام ہندا رویہ ءِ قبول کرسا، ہر بندغ تینے لائخ جوڑ کننگ نا رند اٹ ہندا گند انا بشخ اس جوڑ مریک۔ دیر بچانے؟ ڈاکٹر قصاب جوڑ مسنے۔ ہسپتال اٹی ہن تو ڈاکٹر سردار یا آقا غانبار ہیت کیک۔ بڈ اس ٹیسٹ لکھک، ایتک۔ خمب اس دوائی لکھک۔ دا کل اٹی نیمہ نیمہ اونا کمیشن ءِ۔ اسکول نا ماسٹر چنا تا مون آ تھانیدار جوڑ ءِ۔ تھانیدار نا تو اسُل ہیت ءِ کپیس، محافظ نا جاگہ غا شار انا بھلا دز جند ءِ تے۔ ہر اسٹ ایلو نا دتر تا کننگ نا رند اٹ لگانے۔ است ہزار وار دے اٹی شیف بڑزا مریک۔ ننا است انا کل دشمن اریر۔ سیاستدان، دکاندار، ڈاکٹر، جعلی دانشور، جعلی صحافی، تھانیدار، ماسٹر، پین تو پین ءِ مسیت نا ملا اسکان ہر جمعہ نماز اٹی مخلوق ءِ بڈ اس کرینگ ترسا خوشخبری بنفک کہ نم کل جہنم آ کارے۔ کمبخت اسہ دے ہم ظلم، رشوت، حرام خوری نا زی آ ہیت کپک۔ ہیت کیک تو بس غریب ءِ پاہک نماز کتویس داخہ سال جہنم اٹی مروس۔ نن انت است انا ناجوڑی تیان خلین؟ نن تون است ءِ کس الیتنے۔

ہفتئی تلار 

تاک: 38

03-09 Oct, 2020

پنہ: 06