اسٹیل مل انتظامیہ کل ملازم آتے کشنگ کپک‘چیف جسٹس

اسلام آباد( آن لائن)سپریم کورٹ پاکستان سٹیل ملز نا پبلک پرائیویٹ شریکی نا حکومتی ڈٹ آتیا سوج کرے۔ چیف جسٹس گلزار احمد پاکستان اسٹیل مل انتظامیہ آ اُست ہسونی نا درشانی ءِ کرسا پارینے کہ کل ملازم آتے کشنگ کپنہ، سٹیل مل نا بابت پارینے کہ ڈٹ آک بیرہ بھسکاری ءُ، سپریم کورٹ ٹی چیف جسٹس گلزار احمد نا کماشی ٹی مسہ باسکی بنچ پاکستان سٹیل مل نا ملازم آتا بابت کیس انا سماعت ءِ کرے۔ عدالت بنجائی حکومت آن اسٹیل مل نا بابت رپورٹ بٹنگانے۔ چیف جسٹس گلزار احمد ریمارک تس کہ زیات ہوشیاری اسٹیل مل انتظامیہ نا لخ اٹ تمک۔ ایڈیشنل اٹارنی جنرل عدالت ءِ پارے کہ کابینہ اسٹیل مل نا کل ملازم آتے کشنگ نا فیصلہ ہم کتنن۔ چیف جسٹس پارینے کہ ملازم آتے ہندن کشار تو5ہزار مقدمہ جوڑ مریک۔ وکیل اسٹیل مل ملازم آک عدالت ءِ پارینے کہ ملازم آتا برطرفی کن 40 ارب درکار مریرہ۔ چیف جسٹس ریمارکس تس کہ دہن مف کہ اسٹیل مل انتظامیہ ءِ برطرف کروک آ ملازم آتے ولدا تخوئی تما، اسٹیل ملز انتظامیہ زیات ہوشیاری نشان ایتک تو دا اوفتا لخ اٹ تمک، چیف جسٹس حکومتی وکیل پارینے کہ حکومت انت اس کننگ اٹی ءِ داڑان بھسکاری تالان کیک، نم دا معاملہ ءِ بھاز خراب ءُ وڑ اسے ٹی ہننگ اٹی ءِ، حکومت تینا کروک آ فیصلہ غاتیا انتئے مننگ اٹی اف، عدالت نمے آسرا تننگ کپک، نمے اندازہ اف او انت اس کننگ اٹی ءِ، جسٹس اعجازالاحسن اسہ وخت اس پارینے کہ نما ڈٹ ہندا ءِ کہ 95 درسد ملازم آتے کشنگک او کنٹریکٹ آ پُوسکن ءُ ملازم بھرتی مریرہ، دا وخت آ اسٹیل مل ملازم آتا ہائیکورٹس اٹ 320 و سپریم کورٹ اٹ 29 مقدمہ زیر سماعت ءُ، عدالت عظمیٰ پاکستان اسٹیل مل آن پُوسکن آ رپورٹ ءِ بٹنگسا فریق مقدمہ نا وکیل کامران مرتضیٰ نا ناجوڑی نا سوب آن سماعت ءِ چار ہفتہ اسکان ملتوی کرے۔